उदयपुर । उदयपुरको कटारी नगरपालिका–६ स्थित साघुँरी चुरे जंगलबाट सशस्त्र प्रहरीले १ सय ३० किलो गाँजा बरामद गरेको छ। बुधबार बिहान करिब २ः३० बजे मोटरसाइकल गस्तीमा खटिएको सशस्त्र प्रहरी टोलीले ठूलो परिमाणमा गाँजा बरामद गरेको हो।
सशस्त्र प्रहरी बल नेपाल सुरक्षा बेस क्याम्प कटारीका प्रहरी निरीक्षक गोविन्द पौडेलका अनुसार चुरे जंगलमा पैदल हिँडिरहेका गाँजा तस्करहरूले सुरक्षाकर्मीलाई देखेपछि गाँजाको पोका छाडेर जंगलतर्फ भागेका थिए।
पौडेलका अनुसार १० जना सुरक्षाकर्मी मोटरसाइकल गस्तीमा रहेका बेला प्लास्टिकका झोलामा प्याक गरी बोकेको अवस्थामा गाँजा फेला परेको हो। सुरक्षाकर्मीलाई देखेपछि तस्करहरू गाँजा छाडेर फरार भएकाले उनीहरूलाई पक्राउ गर्न भने नसकिएको प्रहरीले जनाएको छ।
बरामद गरिएको गाँजा आवश्यक अनुसन्धान तथा कानुनी कारबाहीका लागि इलाका प्रहरी कार्यालय कटारीमा बुझाइएको सशस्त्र प्रहरीले जनाएको छ।
कटारी क्षेत्रमा केही दिनअघि पनि प्रहरीले १३ सय २१ किलो गाँजासहित दुई जनालाई टिपर र बोलेर सहित पक्राउ गरेको थियो।
