प्रतिनिधिसभामा आकस्मिक समयमा बोल्दै नेपाली कम्युनिस्ट पार्टीका प्रमुख सचेतक युवराज दुलालले आगो लगाउने चालकको मृत्यु भएको घटनाप्रति दु:ख व्यक्त गरे ।
केही समय अगाडि गणेश नेपालीले पनि त्रिपुरेश्वरमै आगजनी गरेको स्मरण गरे ।
सार्वजनिक यातायातमा विवाद हुँदै गरेको भिडियो आएको भन्दै उनले त्यसमा के भएको हो ? भनेर सरकारसँग जवाफ मागे । यी घटनाले युवामा रहेको निराशा समेत देखाएको भनेर सरकारको ध्यानाकर्षण गरेका हुन् ।
यो घटनाबारे छानबिन गर्न न्यायीक समिति गठन गर्नुपर्ने उनको माग छ ।
रास्वपाकी सचेतक क्रान्तिशिखा धितालले पुलिसिङ गर्ने शैलीका सन्दर्भमा ख्याल गर्न आवश्यक रहेको बताइन् । गणेश नेपालीको घटना र मंगलबारको घटनापछि यो विषयमा ख्याल गर्नुपर्ने महसुस भएको जनाएकी हुन् ।
साथै, चालकहरूको मनोसामाजिक अववस्थालाई व्यवसायी र सरकारले ख्याल गर्नुपर्ने जनाइन् । बदल्नुपर्ने के हो त्यो बदल्न सरकार अगाडि बढ्नुपर्ने उनको आग्रह छ ।
न्यून तलब र आराम नदिने विषय यमसा जोडिन्छ कि भनेर ख्याल गर्न र चालकलाई दोष देखाएर उम्कने प्रवृति नदोर्याउन उनको आग्रह छ ।
रास्वपाकी सांसद आशिका तामाङले ट्राफिक प्रहरीले गरेको कारबाही चित्त नबुझे उजुरी दिन सकिने प्रावधान रहेको बताइन् ।
उजुरी दिन सक्ने प्रावधान कतिको उचित छ भनेर ख्याल गर्न उनले आग्रह गरिन् ।
५०० को जरिवाना चित्त बुझेन भनेर ५० हजार खर्च गरेर उजुरी दिन सक्ने व्यवहारिक नरहेको भनेर उनले यसमा सुधार हुनुपर्नेमा जोड दिइन् ।
ट्राफिक प्रहरीले पनि फोटो र भिडियो लिएर त्यसआधारमा पछि कारबाही गर्ने र ठाउँको ठाउँ कारबाही गर्ने प्रवृतिलाई न्यून गर्नुपर्ने उनको आग्रह छ ।
