काठमाडौं । रास्वपा सांसद क्रान्तिशिखा धितालले ट्राफिक प्रहरीले चालक र यात्रुसँग गर्ने व्यवहार एवम् कार्यशैलीको गम्भीर समीक्षा हुनुपर्ने जनाएकी छन् ।
मंगलबार प्रतिनिधिसभा बैठकको आकस्मिक समयमा सांसद धितालले सडकमा राष्ट्रसेवक, सुरक्षाकर्मी तथा ट्राफिक प्रहरीले चालक र यात्रुसँग गर्ने व्यवहार एवम् कार्यशैलीको गम्भीर समीक्षा हुनुपर्ने र आवश्यक सुधार गरिनुपर्ने जनाएकी हुन् ।
उनले त्रिपुरेश्वरमा भएको घटनाबारे बाहिर आएका विवादास्पद विगत वा सूचनाहरूमा थप अनुसन्धान गरी प्रहरीले सत्यतथ्य बाहिर ल्याउने विश्वास व्यक्त गरिन् ।
उनले चालकहरूको आत्मसम्मान, इज्जत, न्यूनतम पारिश्रमिक, खानपान, आराम, काम गर्ने लामो समय तथा शारीरिक एवम् मानसिक स्वास्थ्यको परीक्षण नहुनु संवेदनशील विषय भएको जनाइन् ।
चालकलाई मात्र दोष थोपारेर समस्या समाधान नहुने भन्दै उनले राज्य, सम्बन्धित निकायहरू, यातायात व्यवसायी तथा स्वयं चालक समेत गम्भीर हुनुपर्ने धारणा राखिन् ।
त्यस्तै अन्य सांसदहरूले त्रिपुरेश्वरमा भएको घटनाप्रति दुख व्यक्त गर्दै सार्वजनिक सवारीका क्षेत्रमा देखिएका समस्या समाधानका लागि गम्भीर हुनुपर्ने जनाएका छन् । साथै उनीहरूले उक्त घटनामा गृहमन्त्रीको जवाफ माग गरेका छन् ।
