रविलाई रोक्न चौतर्फी घेराबन्दी, राजावादी र एमसीसी विरोधी रविसँग असन्तुष्ट
काठमाडौं । आगामी वैशाख २० गते तीन जिल्लामा हुने उपनिर्वाचनलाई राजनीतिक दलहरुले प्रतिष्ठाको विषय बनाएपछि प्रतिस्पर्धा रोचक हुने देखिएको छ । उपनिर्वाचन हुन लागेको तीनै स्थान तनहुँ–१, चितवन–२ र बारा–२ मा हेभिवेट भीडन्त हुने पक्का भएको छ । तनहुँका सांसद रामचन्द्र पौडेल राष्ट्रपति, बाराका रामसहायप्रसाद यादव उपराष्ट्रपति निर्वाचित भएपछि त्यहाँ उपनिर्वाचन हुन लागेको हो । यस्तै, चितवनबाट निर्वाचित रवि लामिछानेको नागरिकता विवादका कारण सांसद पद खारेज भएको थियो ।
तीनवटा निर्वाचन क्षेत्रमा नै चर्चित र पार्टीका प्रमुख नेता नै उम्मेदवार भएकाले उपनिर्वाचनमा सम्पूर्ण देशवासीको चासो देखिएको हो । विशेषगरी चितवनको उपनिर्वाचन अहिले सबैको नजरमा छ । त्यहाँ रास्वपाका सभापति रवि लामिछानेले नै पुनः मनोनयन गराएका छन् । यसअघि पहिलोपटक उम्मेदवार बन्दा नै निर्वाचन जितेका उनी पुनः उपनिर्वाचन जितेर संसद प्रवेश गर्ने दाउमा छन् । यसपटक उनीविरुद्ध कांग्रेसले युवानेता जितनारायण श्रेष्ठलाई लामिछानेविरुद्ध खडा गराएको छ ।
एमालेले भने रामप्रसाद न्यौपानेलाई उम्मेदवार बनाएको छ । न्यौपाने एमाले चितवन जिल्ला अध्यक्ष हुन् । उनी गत निर्वाचनमा चितवन–३ बाट उम्मेदवार बने पनि कांग्रेसका बागी उम्मेदवार दिनेश कोइरालालाई एमालेले समर्थन गरेपछि न्यौपानेको उम्मेदवारी फिर्ता गरिएको थियो । चुनाव नजिकिएसँगै रास्वपाका सभापति लामिछानेको मुद्दा पनि पुनः बल्झिन थालेको छ । नागरिकता र राहदानीको मुद्दा चर्काएर फेरि लामिछानेलाई घेराबन्दीमा पार्न एउटा समूह पुनः सक्रिय भएको थियो । नयाँ नागरिकता लिइसकेको र राहदानीको विषयमा मुद्दा नचल्ने महान्यायाधिवक्ताको कार्यालयले निर्णय गरिसके पनि यो मुद्दा सर्वोच्च अदालतमा प्रवेश गरेको छ ।
महान्यायाधिवक्ता कार्यालयले २०६५ असारमा कांग्रेसको तर्फबाट सांसद तथा मन्त्री समेत भइसकेका मोहमद अफताब आलमको मुद्दा नचलाउने निर्णय गरे पनि पछि मुद्दा उल्टिएको थियो । तर, उक्त निर्णयविरुद्ध अदालतमा रिट दायर भएपछि आलमविरुद्ध अनुसन्धान प्रक्रिया अघि बढ्यो । जिल्ला अदालत रौतहटले उनलाई पुर्पक्षका लागि जेल चलानको आदेश समेत दियो । त्यसयता उनी कारागारमा बन्दी जीवन बिताइरहेका छन् । यही उदाहरण दिँदै सिन्धुलीका युवराज पौडेल ९सफल०ले लामिछानेविरुद्ध सर्वोच्चमा निवेदन दिएका हुन् । अहिले यो रिट सर्वोच्चमा विचाराधीन छ । उसो त लामिछानेले एमसीसीप्रति समर्थन र राजातन्त्रप्रति बेवास्ता देखाउँदै आएका छन्, त्यसैले एमसीसी विरोधी र राजावादीले पनि उनीप्रति असन्तुष्टि व्यक्त गर्दै आएका छन् ।
तनहुँ–१ मा भने कांग्रेसबाट गोविन्द भट्टराईले मनोनयन दर्ता गराएका छन् । उनी सत्तारुढ गठबन्धनका साझा उम्मेदवार हुन् । यसअघि कांग्रेसले जितेको र अहिले सत्ता गठबन्धनको पनि साथ रहेकाले भट्टराईको पल्लाभारी देखिन्छ ।तर, उनको मुख्य चुनौती राष्ट्रिय स्वतन्त्र पार्टीका डा। स्वर्णिम वाग्ले र नेकपा एमालेका सवेन्द्र खनालको हुनेछन् । अर्थशास्त्री वाग्ले हालैमात्र कांग्रेस छाडेर रास्वपा प्रवेश गरेका हुन् । यस्तै खनाल अवकाश प्राप्त प्रहरी महानिरीक्षक हुन् । यसअघि काठमाडौं निर्वाचन हारेका खनाललाई एमालेले फेरि तनहुँमा उम्मेदवार बनाएको हो ।
तनहुँमा अन्य दलका उम्मेदवारमा राप्रपाकी शोभा गुरुङ, नेपाल मजदुर किसान पार्टीका रामप्रसाद प्रजापति, मंगोल नेसनल अर्गनाइजेसनका प्रेमबहादुर थापा, राष्ट्रिय जनमुक्ति पार्टीका पूर्णबहादुर राना पनि छन् ।
बारा–२ मा सत्तारुढ गठबन्धनबाट जनता समाजवादी पार्टीका अध्यक्ष उपेन्द्र यादवले उम्मेदवारी दिएका छन् । यो क्षेत्रमा गत निर्वाचनमा जसपाले जित हासिल गरेको थियो । सप्तरीबाट चुनाव हारेका यादवले बाराबाट संसद् प्रवेश रणनीति बनाएका छन् । तर, उनलाई मधेशवादी दल जनमत पार्टीकै मुख्य चुनौती हुनेछ । यहाँ जनमत पार्टीले शिवचन्द्र कुशवाहलाई आफ्नो उम्मेदवार बनाएको छ । गत निर्वाचनमा माओवादी केन्द्रबाट यही क्षेत्रमा उम्मेदवारी बनेका कुशवाह यसपटक जनमत प्रवेश गरी उम्मेदवार बनेका हुन् । गत निर्वाचनमा कुशवाह जसपाका रामसहायप्रसाद यावदसँग पराजित भएका थिए । उनीहरुलाई रास्वपाका उम्मेदवार रमेश खरेलले चुनौती दिनेछन् । खरेल अवकाशप्राप्त प्रहरी नायब महानिरीक्षक (डीआईजी) हुन् । यस्तै, एमालेका पुरुषोत्तम पौडेल, नेमकिपाका मुक्ति यादव पनि उम्मेदवार छन् । यो उपचुनावले दलहरुको लोकप्रियताको मापन पनि हुन सक्ने आंकलन गर्न सकिन्छ । जनधारणा साप्ताहिक
