काठमाडौं । इलोन मस्कको भू-उपग्रहमा आधारित इन्टरनेट कम्पनी स्टारलिङ्कले नेपाल र तिब्बत सीमा क्षेत्रमा आएको विनाशकारी बाढीप्रति गहिरो दुःख व्यक्त गर्दै विपद् प्रभावित क्षेत्रमा निःशुल्क इन्टरनेट सेवा उपलब्ध गराउन तयार रहेको घोषणा गरेको छ।
शनिबार सामाजिक सञ्जाल एक्समार्फत एक सन्देश जारी गर्दै कम्पनीले नेपाल सरकार र मानवीय सहायतामा खटिएका निकायहरूलाई सघाउन तयार रहेको स्पष्ट पारेको हो।
विपद्मा किन महत्त्वपूर्ण छ स्टारलिङ्क ?
यस प्रविधिले विशेषगरी बाढी प्रभावित क्षेत्रमा विभिन्न कार्यमा प्रत्यक्ष लाभ पुर्याउने कम्पनीको भनाइ छ । कम्पनीका अनुसार, बेपत्ताहरूको खोजी कार्यमा समन्वय गरिरहेका उद्धार टोलीहरूलाई, घाइतेहरूको उपचारमा खटिएका स्वास्थ्यकर्मी र मेडिकल टोलीलाई, आफ्ना सम्पर्कविहीन आफन्त र प्रियजनसँग जोडिन प्रयास गरिरहेका परिवारहरूलाई यो सेवा लाभदायी हुनेछ ।
कसरी काम गर्छ ?
स्टारलिङ्कका अनुसार, यसका उपकरणहरू बक्सबाट निकालेको केही मिनेटभित्रै जडान गरी उच्च गतिको इन्टरनेट सञ्चालन गर्न सकिन्छ। यसलाई चलाउनका लागि केवल दुई कुरा विद्युत् आपूर्ति र उपकरणले सिधा देख्ने खुला आकाश आवश्यक पर्दछ ।
