काठमाडौं । नेकपा एमालेकी संसदीय दलकी उपनेता पद्मा अर्यालले वर्तमान सरकारको सय दिनको कार्यकालमा अधिनायकवादी र सर्वसत्तावादी प्रवृत्तिको प्रतिविम्ब देखिएको आरोप लगाएकी छन्।
बुधबार प्रतिनिधिसभा बैठकमा सरकारको सय दिनको कार्यसम्पादनबारे धारणा राख्दै अर्यालले नयाँ सरकार गठनसँगै देशको राजनीतिक संस्कार, संवैधानिक सर्वोच्चता, शक्ति पृथकीकरणको सिद्धान्त र नागरिक स्वतन्त्रता सङ्कटमा परेको दाबी गरिन्।
उनले सरकार राष्ट्रिय हितका विषयमा गम्भीर रूपमा चुकेको आरोप लगाउँदै नेपालले भारतको भूमि मिचेको भन्ने विवादास्पद अभिव्यक्तिले देशको ऐतिहासिक गौरव र राष्ट्रिय स्वाधीनतालाई कमजोर बनाएको बताइन्।
अर्यालले संविधान कुनै सरकारको क्षणिक राजनीतिक सुविधा वा सत्ता सन्तुलन मिलाउने साधन नभएको उल्लेख गर्दै संविधानका आधारभूत व्यवस्था परिवर्तन गर्ने वा कमजोर बनाउने कुनै पनि प्रयास स्वीकार्य नहुने स्पष्ट पारिन्।
अर्यालले प्रतिपक्षले विरोधका लागि मात्र विरोध नगर्ने भन्दै जनमतको सम्मान हुने गरी सरकारलाई सफल बनाउन आवश्यक खबरदारी जारी राख्ने बताइन्।
सरकारलाई सय दिनको कार्यकालबाट गम्भीर पाठ सिक्न सुझाव दिँदै उनले राजनीतिक प्रतिशोध, घृणाबाट प्रेरित गैरन्यायिक गिरफ्तारी, अपारदर्शी समूहको निर्देशनमा सरकार सञ्चालन, विधिको शासनको उल्लङ्घन तथा संसद्प्रतिको गैरजवाफदेहिता त्याग्न आग्रह गरिन्।
