काठमाडौं । फिफा विश्वकप २०२६ मा एक अप्रत्याशित नतिजा निकाल्दै पाराग्वेले चार पटकको विजेता जर्मनीलाई प्रतियोगिताबाट बाहिर पठाएको छ । सोमबार बिहानका राति भएको रोमाञ्चक र तनावपूर्ण राउन्ड अफ ३२ को खेलमा जर्मनीलाई पेनाल्टी सुटआउटमा पराजित गर्दै पाराग्वे अन्तिम १६ मा प्रवेश गरेको हो ।
निर्धारित ९० मिनेट र थप गरिएको अतिरिक्त समयको खेल १–१ को बराबरीमा सकिएपछि खेलको निर्णय पेनाल्टी सुटआउटबाट लिइएको थियो । सुटआउटमा पाराग्वे ४–३ ले विजयी भयो ।
विश्वकप इतिहासमा जर्मनी पेनाल्टी सुटआउटमा पराजित भएको यो पहिलो पटक हो । यो पराजयसँगै जर्मनी सन् २०१० मा विश्वकप जितेयता लगातार चौथो पटक अन्तिम १६ मा पुग्न असफल भएको छ ।
खेलको ४२ औँ मिनेटमा जुलियो एन्सिसोले हेडमार्फत उत्कृष्ट गोल गर्दै पाराग्वेलाई सुरुवाती अग्रता दिलाएका थिए । पहिलो हाफमा कमजोर प्रदर्शन गरेको जर्मनीले दोस्रो हाफको सुरुवातमै खेलमा पुनरागमन गर्यो । ५३ औँ मिनेटमा काइ हाभर्ट्जले गोल गर्दै जर्मनीलाई १–१ को बराबरीमा ल्याए ।
त्यसपछि जर्मनीले कर्नरमार्फत अर्को एक गोल गरे पनि पाराग्वेका गोलकिपरमाथि फल भएको भन्दै भिडियो असिस्टेन्ट रेफ्रीले त्यसलाई मान्यता दिएन ।
यस सिजन आर्सनललाई २२ वर्षपछि प्रिमियर लिगको उपाधि दिलाउन महत्त्वपूर्ण भूमिका खेलेका जर्मन फरवार्ड काइ हाभर्ट्ज पेनाल्टी सुटआउटको पहिलो प्रहारमै चुकेका थिए । सुटआउटमा जर्मनीका तीन खेलाडीले गोल गर्न सकेनन् भने पाराग्वेका दुई खेलाडीको प्रहार विफल भएको थियो ।
विश्वकप इतिहासकै ठुलो धक्का
फिफा वरीयतामा १० औँ स्थानमा रहेको जर्मनी र ४१ औँ स्थानमा रहेको पाराग्वेबीचको यो नतिजालाई विश्वकप नकआउट चरणकै सबैभन्दा ठुलो हार मानिएको छ । यसअघि सन् १९९४ को अमेरिकी विश्वकपमा साविक विजेता जर्मनीलाई बुल्गेरियाले क्वार्टरफाइनलमा २–१ ले हराउनुलाई ठुलो उलटफेर मानिन्थ्यो । त्यतिबेला बुल्गेरिया फिफा वरीयताको २९ औँ स्थानमा थियो भने टोलीमा बालोन डी’ओर विजेता ह्रिस्टो स्टोइचकोभ जस्ता स्टार खेलाडी थिए । तर, पाराग्वेको यो जितले उक्त ऐतिहासिक नतिजालाई पनि छायामा पारिदिएको छ ।
