काठमाडौं । फिफा विश्वकप प्रतियोगिताअन्तर्गत भएको खेलमा इङ्ल्याण्ड र घानाले बराबरीमा टुंग्याएका छन् । समूह ‘एल’अन्तर्गतको आफ्नो दोस्रो खेलमा दुवै टोलीले गोलरहित बराबरी खेलेका हुन्।
बोस्टन नजिकैको जिलेट स्टेडियममा ६३ हजार ९ सय ८३ दर्शकमाझ बुधबार राति भएको खेलमा इङ्ल्यान्डले अधिकांश समय बल आफ्नो नियन्त्रणमा राखेको थियो । खेलभरि इङ्ल्यान्डले विपक्षीको पोस्टमा १९ पटक प्रहार गरे पनि घानाका वैकल्पिक गोलरक्षक बेन्जामिन आसारे बाधक बने । घानाले भने खेल अवधिभर मात्र दुई पटक गोलको प्रयास गरेको थियो । इङ्ल्यान्डका निको ओ’रेलीले खेलको उत्तरार्धमा प्रहार गरेको हेड बल बारमा लागेर फर्किएपछि टोली जितबाट चुकेको थियो ।
पहिलो खेलमा क्रोएसियालाई ४–२ ले हराएर सनसनीपूर्ण सुरुवात गरेको इङ्ल्यान्डको यो फितलो प्रदर्शनले टोलीको विश्वकप उपाधि यात्राको सम्भावना माथि पुनः प्रश्न उठाएको छ । खेल अवधिभर इङ्ल्यान्डको प्रदर्शन गत युरो २०२४ को कमजोर लय जस्तै देखिएको थियो ।
यो बराबरीका बावजुद दुवै टोलीको अन्तिम ३२ (नकआउट चरण) मा पुग्ने सम्भावना भने बलियो छ । समूह ‘एल’ मा दुवै टोलीको दुई खेलबाट समान ४–४ अंक भएको छ । इङ्ल्यान्डले अब शनिबार मेटलाइफ स्टेडियममा पानामासँग समूह चरणको अन्तिम खेल खेल्नेछ । उक्त खेलमा पराजित नभए इङ्ल्यान्ड अर्को चरणमा प्रवेश गर्नेछ ।
विश्वकप इतिहासमा इङ्ल्यान्ड अहिलेसम्म कुनै पनि अफ्रिकी टोलीसँग पराजित भएको छैन र त्यो कीर्तिमान यस पटक पनि जोगिएको छ । फिफा वरीयतामा इङ्ल्यान्डभन्दा ६९ स्थान पछाडि (७३ औं स्थानमा) रहेको घानाले उत्कृष्ट रक्षात्मक खेल प्रदर्शन गर्यो ।
समूह चरणको आफ्नो पहिलो खेलमा इङ्ग्ल्याण्डले क्रोएसियालाई ४–२ गोलअन्तर र घानाले पानामालाई १–० गोलले पराजित गरेका थिए ।
विश्वकप प्रतियोगिताअन्तर्गत गए राति भएको खेलमा पोर्चुगलले उज्वेकिस्तानलाई ५–० गोलअन्तरले पराजित गरेको थियो । साथै आज बिहान ४ः४५ बजे पानमा र क्रोएसियाबीच खेल हुँदैछ । साथै बिहान ७ः४५ बजे कोलम्बिया र कङ्गोबीच खेल हुनेछ।
