काठमाडौं। संसदको सबैभन्दा ठूलो दल राष्ट्रिय स्वतन्त्र पार्टीका सभापति रबि लामिछानेले बोलाएको सर्वदलीय बैठकलाई पुराना दलले उपेक्षा गरेका छन् भने नयाँ भनिएको श्रम संस्कृति पार्टीले बहिष्कार गरेको छ ।
संसदमा जारी गतिरोध अन्त्यका साथै देश बनाउने अभियानमा संसदमा प्रतिनिधित्व गर्ने दलहरुको साझा धारणा बनाउन सभापति लामिछानेले सर्वदलीय बैठक बोलाएका थिए ।
संसदमा निरन्तर विरोध गरेर सरकारलाई कामै गर्न नदिने रणनीति लिएका विपक्षी दलहरुले गतिरोध हटाउन सत्तारुढ दलले लिएको पहलकदमीलाई पनि उपेक्षा गरेका हुन् । संसदमा उग्र रुपमा प्रस्तुत भइरहेका हर्क साम्पाङ्ग नेतृत्वको श्रम संस्कृतिले त बैठकमा सहभागिता नै जनाएन् ।
सिंहदरबारस्थित लेखा समितिको हलमा सुरु भएको बैठकमा प्रतिनिधिसभा र राष्ट्रिय सभामा प्रतिनिधित्व गर्ने राजनीतिक दलहरुबाट पार्टी अध्यक्ष/सभापति सहित दुईजना सहभागी हुन आमन्त्रण गरिएको थियो । तर, कांग्रेस, एमाले र नेकपाले अध्यक्षलाई नपठाएर उपेक्षा गरेको हो । राष्ट्रिय सभामा प्रतिनिधित्व रहेको जसपाले पनि अध्यक्ष पठाएको छैन ।
बैठकमा कांग्रेस सभापति गगन थापा, एमाले अध्यक्ष केपी ओली, नेकपा संयोजक प्रचण्ड सहभागी भएनन् । कांग्रेसले संसदीय दलका नेता भिष्म आङ्देम्बे र सांसद फिरदोश आलमलाई पठाएको छ ।
एमालेले प्रमुख सचेतक ऐन महरलाई पठाएको छ । नेकपाले भने सहसंयोजक एवं पूर्वप्रधानमन्त्री माधव नेपाल, नेता वर्षमान पुनलाई पठाएको छ ।
राप्रपा अध्यक्ष राजेन्द्र लिङ्देन आफै सहभागी भएका छन् । जसपाबाट राष्ट्रिय सभा सदस्य मोहम्मद खालिद र नेता सुरेन्द्र झा सहभागी छन् ।
