काठमाडौं । सिद्धार्थ बैंक लिमिटेडले जाजरकोट–रुकुम पश्चिम भूकम्पबाट क्षतिग्रस्त विद्यालयको भवन पुनर्निर्माण गरी हस्तान्तरण गरेको छ।
बैंकको आर्थिक सहयोगमा कर्णाली प्रदेशको सानीभेरी गाउँपालिका–१ भण्डारवनस्थित श्री जनप्रिय आधारभूत विद्यालय को नयाँ भवन तथा सुलभ पहुँचयुक्त शौचालय निर्माण सम्पन्न भएपछि बुधबार औपचारिक रूपमा विद्यालयलाई हस्तान्तरण गरिएको हो।
वि.सं. २०८० कात्तिक १७ गते गएको विनाशकारी भूकम्पबाट विद्यालय भवनमा क्षति पुगेपछि सिद्धार्थ बैंकले पुनर्निर्माणको जिम्मेवारी लिएको थियो। नवनिर्मित भवनको उद्घाटन बैंकका प्रमुख कार्यकारी अधिकृत रामेश्वर प्रसाद बस्याल ले गर्दै विद्यालयका प्रधानाध्यापक हंसबहादुर खड्कालाई भवन हस्तान्तरण गरेका हुन्।
विद्यालय परिसरमा आयोजित कार्यक्रममा बैंकका पदाधिकारी, स्थानीय जनप्रतिनिधि, विद्यालय व्यवस्थापन समिति, शिक्षक, अभिभावक तथा विद्यार्थीहरूको सहभागिता रहेको थियो।
समारोहलाई सम्बोधन गर्दै सीईओ बस्यालले विद्यालय भवन निर्माणलाई केवल भौतिक पूर्वाधार निर्माणका रूपमा नभई भूकम्पपछिको पुनःस्थापना, बालबालिकाको सुरक्षित भविष्य र गुणस्तरीय शिक्षाप्रतिको प्रतिबद्धताको प्रतीकका रूपमा लिनुपर्ने बताए।
उनले विद्यालय बालबालिकाको भविष्य निर्माण गर्ने आधारभूमि भएकाले सुरक्षित र गुणस्तरीय शैक्षिक वातावरण सुनिश्चित गर्न बैंकले सामाजिक उत्तरदायित्वअन्तर्गत यो परियोजना सम्पन्न गरेको उल्लेख गरे।
बैंकका अनुसार नवनिर्मित भवनले विद्यार्थीहरूको सुरक्षित शिक्षामा पहुँच विस्तार गर्नुका साथै नियमित पठनपाठन, सिकाइ वातावरण र समग्र शैक्षिक गुणस्तर सुधारमा योगदान पुर्याउने अपेक्षा गरिएको छ।
सिद्धार्थ बैंकले दिगो विकास लक्ष्यअनुरूप शिक्षा, स्वास्थ्य, वातावरण तथा समुदाय विकाससँग सम्बन्धित विभिन्न सामाजिक उत्तरदायित्वका कार्यक्रम सञ्चालन गर्दै आएको जनाएको छ।
