काठमाडौं । बुढानिलकण्ठ नगरपालिका-३ नारायणस्थान चोकमा बा.५१ प ६८४७ नम्बरको मोटरसाइकल अनियन्त्रित भई दुर्घटना हुँदा चालक काठमाडौं महानगरपालिका-३ बाँसबारी बस्ने गोरखा घर भएका ३० वर्षीय आशिष गुरूङको मृत्यु भएको छ । मंगलबार दिउँसो भएको उक्त दुर्घटनामा गम्भीर घाइते भएका उनको शिक्षण अस्पतालमा उपचारको क्रममा गए राति मृत्यु भएको हो । साथै दुर्घटनामा घाइते भएकी मोटरसाइकलमा सवार १ जनाको सोही अस्पतालमा उपचार भइरहेको छ ।
तनहुँ, आँबुखैरेनी गाउँपालिका-१ सत्रसय आँधीखोलास्थित सडकमा आँबुखैरेनीबाट डुम्रेतर्फ जाँदै गरेको बागमती प्रदेश ०६-००७ प ३७६६ नम्बरको स्कुटर अनियन्त्रित भई बुधबार बिहान दुर्घटना हुँदा स्कुटरमा सवार गोरखा शहिदलखन गाउँपालिका-७ बस्ने २७ वर्षीया सम्पदा गुरूङको मृत्यु भएको छ । दुर्घटनामा गम्भीर घाइते भएकी उनको लक्ष्मी सिटी हस्पीटल डुम्रेमा उपचारको क्रममा मृत्यु भएको हो । स्कुटर चालकलाई प्रहरीले नियन्त्रणमा लिएको छ ।
काभ्रे, धुलिखेल नगरपालिका-९ पानी ट्याङ्कीस्थित सडकमा धुलिखेलबाट काभ्रेभञ्ज्याङतर्फ जाँदै गरेको प्र.३-०२-००८ प ७१४३ नम्बरको स्कुटर अन्यन्त्रित भई मंगलबार दिउँसो दुर्घटना हुँदा स्कुटरमा सवार सोही नगरपालिका-११ बस्ने २० वर्षीय निर्जल घिमिरेको मृत्यु भएको छ । दुर्घटनामा गम्भीर घाइते भएका उनको धुलिखेल अस्पतालमा उपचारको क्रममा मृत्यु भएको हो । स्कुटर चालकलाई प्रहरीले नियन्त्रणमा लिएको छ ।
सिराहा, कर्जन्हा नगरपालिका-१० मनहर्वा चोकस्थित सडकमा बा. २ क ५३२० नम्बरको बसको ठक्करबाट पैदलयात्री सोही ठाउँ बस्ने साबिर खानको छोरा ८ वर्षीय मुजमिल खानको मृत्यु भएको छ । मंगलबार दिउँसो भएको उक्त दुर्घटनामा गम्भीर घाइते भएका उनको न्यूरो अस्पताल विराटनगरमा उपचारको क्रममा गए राति मृत्यु भएको हो । प्रहरीले हाल फरार बस चालकको खोजी गरिरहेको छ ।
दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।
