जेरुसेल । इजरायली सेनाले दक्षिण लेबनानमा गरेको पछिल्लो हवाई आक्रमणमा दुई जनाको मृत्यु भएको जनाएको छ । गत हप्ता इजरायली र लेबनानी अधिकारीको सम्झौतामा विस्तार गरेको युद्ध-विरामको बाबजुद इजरायल र इरान समर्थित समूहले लेबनानको दक्षिणी क्षेत्रमा नियमितरूपमा गोलीबारी गर्दै आएका छन् ।
“केही समय अघि, आइडिएफको निगरानीले दक्षिणी लेबनानमा इजरायली क्षेत्रबाट सयौँ मिटर टाढा हिँडिरहेका दुई सशस्त्र व्यक्ति पहिचान गरेको इजरायली सेनाले टेलिग्राममा पोष्ट गरेको थियो । आईडीएफले उनीहरूको पहिचान र निरन्तर निगरानी गरेपछि, ती व्यक्तिलाई हवाई आक्रमण गरी मारिएको पुष्टि गरेको छ ।
लेबनानको राष्ट्रिय समाचार एजेन्सी (एनएनए)ले दक्षिणी टायर जिल्लामा इस्लामिक स्वास्थ्य समितिको साइटमा रात भर भएको आक्रमणमा चार जनाको मृत्यु भएको र दुई चिकित्सक घाइते भएको जनाएको छ । अप्रिल-१७ मा युद्धविराम सुरु भएदेखि, इजरायलले दक्षिण लेबनानमा आक्रमण गर्न, र निकासी आदेश जारी गर्ने प्रक्रिया जारी राखेको छ, भने यसले हेजबुल्लाहलाई लक्षित गरि आक्रमण जारी राखेको जनाएको छ ।
अमेरिका-इजरायली आक्रमणमा इरानका सर्वोच्च नेताको हत्याको बदलामा हेजबुल्लाहले मार्च-२ मा इजरायलमा रकेट प्रहार गरेको थियो । इजरायली सेनाले लेबनानको सीमानाको करिब १० किलोमिटर वरपरको क्षेत्रमा हवाई आक्रमण तथा स्थलगत आक्रमणको जवाफ दिएको थियो । लेबनानको स्वास्थ्य मन्त्रालयले बिहीबार इजरायली आक्रमणले व्यापक क्षेत्रीय युद्ध सुरु भएदेखि कम्तिमा तीन हजार ८९ जनाको ज्यान गएको जनाएको छ ।
इजरायली सेनाले लडाइँको क्रममा २२ जना सैनिकको मृत्यु भएको जनाएको छ । गत हप्ता वासिङ्टनमा लेबनानी र इजरायली प्रतिनिधिबिच तेस्रो चरणको प्रत्यक्ष वार्तापछि अस्थायी युद्धविराम ४५ दिनका लागि बढाइएको थियो, जसमा हिजबुल्लाहले कडा विरोध गरेको थियो । एएफपी
