वासिङ्टन । आगामी जुन ११ बाट सुरु हुन लागेको फिफा विश्वकप फुटबल हेर्न अमेरिका आउने समर्थकले भिसा वापतको धरौटी रकम राख्न नपर्ने भएको छ। यसअघि अमेरिका भ्रमणमा आउँदा १५ हजार डलरसम्म धरौटी राख्नुपर्ने प्रावधान फिफा विश्वकप हेर्न आउने विभिन्न देशका समर्थकका लागि हटाइएको अमेरिकी विदेश विभागले जनाएको छ। अमेरिकी राष्ट्रपति डोनाल्ड ट्रम्प प्रशासनले केही समयअघि कडाइका साथ लागु गरेको अमेरिका प्रवेश गर्दा धरौटी रकम राख्नुपर्ने प्रावधानलाई विश्वकपका लागि खुकुलो बनाइएको हो।
अन्तर्राष्ट्रिय सञ्चार संस्था एसोसिएट प्रेसका अनुसार मुख्यतः विश्वकपमा सहभागी राष्ट्रका टिकट खरिद गरेका विदेशी समर्थकले अमेरिकामा प्रवेश गर्न भिसासँग जोडिएको धरौटी रकम तिर्नु नपर्ने व्यवस्था गरिएको छ। ट्रम्प प्रशासनले विश्वकपमा सहभागी ४८ राष्ट्रसँगै अन्य केही राष्ट्रका फुटबल समर्थकले धरौटी रकम बुझाउनु नपर्ने व्यवस्था गर्न लागेको हो। तर, त्यसका लागि समर्थकसँग बैध टिकट हुनु अत्यावश्यक रहेको जनाइएको छ। ‘विश्वकप फुटबलको बैध टिकट खरिद गरेका समर्थकका लागि धरौटी रकम राख्न नपर्ने व्यवस्था गर्दैछौं’, अमेरिकी कन्सुलर विभागका सहायक विदेश सचिव मोरा नामदारले अन्तर्राष्ट्रिय सञ्चार माध्यमसँग भनेका छन्।
भिसा अवधि सकेर पनि अवैध रुपमा बस्ने जोखिम बढी भएका देशका नागरिकका लागि अमेरिकाले पाँच हजारदेखि १५ हजार अमेरिकी डलरसम्म धरौटी राख्नुपर्ने नियम लागु गरेको थियो। सुरुमा यो नियम ५० देशका यात्रुका लागि लागु गरिएको थियो। अमेरिकी विदेश विभागका अनुसार ५० राष्ट्रमध्ये विश्वकपमा छनोट भइसकेका अल्जेरिया, केप भर्डे, आइभरी कोस्ट, सेनेगल र ट्युनिसियाका समर्थकका लागि भने यो नियम हटाइएको छ। फिफाबाट टिकट खरिद गरेका यी देशका नागरिकले धरौटी तिर्नु नपर्ने अमेरिकी विदेश मन्त्रालयले जनाएको छ।
