काठमाडौं । सरकारले वैशाख २८ गते सोमबार बस्ने संघीय ससद्का दुवै सदनको संयुक्त बैठकलाई सम्बोधन गर्न राष्ट्रपति रामचन्द्र पौडेललाई आग्रह गरेको छ।
आज बसेको मन्त्रिपरिषद् बैठकले वैशाख २८ गते सोमबार दिउँसो ४ बजे संघीय संसद्का दुवै सदनको संयुक्त बैठक बस्ने र उक्त बैठकलाई सम्बोधन गर्न राष्ट्रपतिलाई आग्रह गर्ने निर्णय गरेको प्रवक्ता सस्मित पोखरेलले जानकारी गराए । त्यस्तै सरकारले उक्त बैठकमा उपस्थितिका लागि सबै सांसदलाई अनुरोधसमेत गरेको छ ।
सोमबारको बैठकमा सरकारले नीति तथा कार्यक्रम पेश गर्ने तयारी पनि गरेको छ ।
सरकारको सिफारिसमा राष्ट्रपतिले यसअघि नै संसद्का दुवै सदनको अधिवेशन वैशाख २८ गते सोमबार दिउँसो २ बजे बस्ने गरी आह्वान गरिसकेका छन्।
