भारतको तमिलनाडु विधानसभा निर्वाचनमा अभिनेता विजय थलापतिको पार्टी तमिलगा वेत्री कडगम (टीभीके)ले सबैभन्दा धेरै सिट जित्दै द्रविड पार्टीहरूको दशकौं लामो विरासत भत्काएको छ । तर २३४ सदस्यीय विधानसभामा टीभीकेले १०८ सिट जितेको छ ।
तर, संसद्को सबैभन्दा ठूलो दल बनेपनि थलापतिलाई सत्ताको कमानमा पुग्न भने कठिनाइ देखिएको छ । २३४ सदस्यीय विधानसभामा बहुमत जुटाएर सरकार गठन गर्न ११८ सिट संख्या आवश्यक पर्छ । चुनावी नतिजा आएको तीन दिन बित्दा पनि उनले हालसम्म सरकार गठनका लागि बहुमत जुटाउन सकेका छैनन् ।
तमिलनाडु राजभवन(राज्यपालको कार्यालय)ले बिहीबार एक विज्ञप्ति जारी गर्दै टीभीकेले अहिलेसम्म विधानसभामा बहुमत जुटाउन नसकेको बताएको छ ।
‘तमिलनाडुका माननीय राज्यपाल थिरु राजेन्द्र विश्वनाथ आर्लेकरले आज (मे ७) टीभीकेका अध्यक्ष थिरु सी. जोसेफ विजय(विजय थलापति)लाई चेन्नईस्थित लोक भवनमा आमन्त्रण गर्नुभयो । भेटका क्रममा माननीय राज्यपालले सरकार गठनका लागि आवश्यक तमिलनाडु विधानसभा बहुमतको समर्थन स्थापित हुन नसकेको जानकारी गराउनुभयो,’ राजभवनको विज्ञप्तिमा भनिएको छ ।
१०८ सिट रहेको टीभीकेलाई बहुमत सिद्ध गर्न अझै १० सिट चाहिएको छ । हालसम्म पाँच सिट जितेको कांग्रेस आईले सहयोग गर्ने वचन दिएको छ । तर, अझै उसलाई पाँच सिट चाहिएको छ ।
टीभीकेले बहुमत जुटाउन नसकेको भन्दै राज्यपाल आर्लेकरले विजय थलापतिलाई अहिलेसम्म सरकार गठनका लागि बोलाएका छैनन् । निर्वाचनपछि सबैभन्दा ठूलो पार्टीलाई राज्यपालले सरकार गठनका लागि किन नबोलाएको भन्ने विषयमा तमिलनाडुमा अहिले बहस चर्किएको छ ।
विजयका अगाडि सीमित विकल्प
चुनावमा कुनै पनि दल वा गठबन्धनले स्पष्ट बहुमत नल्याएको अवस्थामा निर्वाचित संसद्लाई ‘हङ असेम्ब्ली’ वा ‘त्रिशंकु संसद्’ भनिन्छ ।
तमिलनाडु विधानसभा निर्वाचनले अहिले त्यही त्रिशंकु संसद् चुनेको छ । जसले सबैभन्दा ठूलो दल टीभीकेलाई नै सरकार बनाउन अप्ठेरो पारेको छ ।
यस्तोमा राज्यपालले ठूलो दललाई सरकार गठनको आह्वान नगर्दा तमाम प्रश्न उठिरहेका छन् । यस्तै टीभीकेलाई बाइपास गरेर परम्परागत प्रतिद्वन्द्वी डीएमके र एआईएडीएमकेबीच गठबन्धन सरकार बन्ने सम्भावनाबारे पनि चर्चा भइरहेका छन् ।
टीभीकेले अझैँ पनि सरकार बनाउन बहुमत जुटाउने प्रयास गरिरहेकै छ । यस्तोमा कांग्रेसबाहेक दुई–दुई सिट जितेका भारतीय कम्युनिस्ट पार्टी (मार्क्सवादी) र सीपीआईले पनि टीभीकेलाई समर्थन गर्नसक्ने संकेत दिएका छन् ।
यस्तै, दुई सिट जितेको इन्डियन युनियन मुस्लिम लिगले पनि ‘रचनात्मक तथा आलोचनात्मक’ समर्थन दिनसक्ने जनाएको छ । यसरी टीभीके प्लसको संख्या ११९ पुग्न सक्छ, जुन बहुमतको आवश्यक संख्या भन्दा बढी हो ।
टीभीके अगाडि दोस्रो विकल्प अल्पमत सरकार बनाउने हो । सबैभन्दा ठूलो पार्टी भएकाले राज्यपालले टीभीकेलाई सरकार बनाउन बोलाउन सक्छन् । सरकार बनाएपछि टीभीकेले अन्य दललाई आफ्नो पक्षमा ल्याउने प्रयास गर्नसक्छ ।
विजयको जितले बढायो चुनौती ?
टीभीके बहुमतभन्दा १० सिटले पछाडि भएपनि सरकार गठनका लागि उसलाई कम्तीमा १२ अतिरिक्त विधायक आवश्यक पर्नेछ ।
किनकि उसले जितेका १०८ सिटमध्ये दुई सिट तिरुचिरापल्ली इस्ट र पेराम्बुरमा विजय थलापति विजयी भएका छन् । नियमअनुसार उनले एउटा सिट खाली गर्नुपर्ने भएकाले टीभीकेको सिट १०७ मात्रै कायम हुने छ ।
यस्तै एक जना सभामुख पनि चयन हुनेछन् । विश्वास मतका बेला सभामुखले मतदान नगर्ने भएकाले टीभीकेको मतदान गर्ने सांसद संख्या घटेर १०६ मा झर्नेछ । –बीबीसी हिन्दीबाट
