काठमाडौं । नेपाली कांग्रेसका १० नेता फागुन २१ गतेको प्रतिनिधिसभा निर्वाचन नलड्ने भएका छन् । उनीहरूले निर्वाचन नलड्ने भन्दै सार्वजनिक रूपमा घोषणा गरेका छन् ।
अहिलेसम्म निर्वाचन नलड्ने घोषणा गर्नेमा विशेष महाधिवेशनबाट निर्वाचित उपसभापति विश्वप्रकाश शर्मा छन् । २०७४ सालमा झापा–१ बाट प्रत्यक्ष निर्वाचित भएका थिए । उनी आफू पार्टीको काममा लाग्ने सार्वजनिक रूपमा बताएका छन् ।
त्यस्तै हृदयराम थानी, दिलेन्द्र प्रसाद बडू, डा. नारायण खड्काले विज्ञप्ति जारी गरेर निर्वाचन नलड्ने बताएका छन् । उनीहरू सबै पूर्वमन्त्री र प्रत्यक्षमा कांग्रेसका तर्फबाट उम्मेदवार बन्दै पटक–पटक निर्वाचन जितेका नेतामा पर्छन् ।
बलबहादुर केसीले आफ्नो जिल्लाका सबै नेताहरूलाई राखेर निर्वाचन नलड्ने घोषणा गरेका छन् ।
काभ्रेका नेता शिव हुमागाईले पनि आइतबार डा. शेखर कोइराला समूहले आइतबार काठमाडौँमा गरेको भेलामा निर्वाचन नलड्ने घोषणा गरेका छन् ।
जेनजी आन्दोलन हुँदा संस्कृति, पर्यटन तथा नागरिक उड्डयनमन्त्री रहेका बद्री पाण्डेले प्रतिनिधिसभा प्रत्यक्ष र समानुपातिक तथा राष्ट्रियसभा कतैतर्फ पनि उम्मेदवारी नदिने घोषणा गरेका छन् । गृहजिल्ला बाजुरा पुगेर पाण्डेले आफू उम्मेदवार नहुने बताएका हुन् । उनी २०७९ को चुनावमा बाजुराबाट निर्वाचित भएका थिए ।
पाण्डेले जेनजी आन्दोलनको समयमा आफू सरकारमा रहेकाले आन्दोलनरत युवाहरूका मागहरूलाई समयमा र अपेक्षित ढंगले सम्बोधन गर्न नसकिएको अनुभूति भएकाले निर्वाचन नलड्ने जनाएका हुन् ।
त्यसअघि पाण्डे राष्ट्रिय सभा सदस्य थिए भने २०७० सालमा संविधानसभा सदस्य थिए।
काठमाडौंको क्षेत्र नम्बर १० मा लगातार तीन वटा चुनाव जितेका राजेन्द्रकुमार केसीले पनि निर्वाचन नलड्ने घोषणा गरेका छन् । प्रतिनिधिसभा प्रत्यक्ष, समानुपातिक वा राष्ट्रियसभामा निर्वाचन नलड्ने उनको भनाइ छ । पार्टीलाई रूपान्तरण र पुस्तान्तरण गर्नुपर्ने भएकोले आफूबाटै यो कामको अगुवाइ गरेको केसीले बताए ।
केसी २०७०, २०७४ र २०७९ मा काठमाडौं १० बाट निर्वाचित भएका थिए ।
अर्का नेता जिपछिरिङ लामाले गृहजिल्ला दोलखाका नेता तथा कार्यकर्ताहरूलाई राखेर आफू निर्वाचन नलड्ने बताएका छन् । लामा २०६४ सालमा पहिलो संविधानसभामा सदस्य थिए । दोस्रो संविधान सभा निर्वाचन हुँदा २०७० सालमा उनी दोलखाबाट चुनाव लडे पनि पराजित भएका थिए ।
निर्वाचन नलड्ने घोषणा गर्नेमा पूर्व कृषिमन्त्रीसमेत रहेका धादिङ कांग्रेस सभापति रामनाथ अधिकारी पनि छन् । भदौ २३ र २४ गते जेनजी आन्दोलन हुँदा मन्त्री रहेका अधिकारीले भदौ २४ गते पदबाट राजीनामा दिएका थिए ।
अधिकारी २०७९ को प्रतिनिधि सभा चुनावमा धादिङ क्षेत्र नम्बर २ बाट निर्वाचित भएका थिए ।
