–निमकान्त पाण्डे
देश चुनावको दिशामा अघि बढेको छ । सरकारले राजनीतिक दल, जेनजी समूह तथा अन्य पक्षसँगको छलफललाई तीव्रता दिएको छ । नयाँ तथा पुराना राजनीतिक दलका शीर्ष नेताहरु पनि आपसी छलफल र सहकार्यमा जुटेका छन् । केही अघिसम्म देशमा चुनावको संशय थियो । तर, सरकारले सबै पक्षसँग छलफल गरेर चुनावको माहोल सृजना गर्ने प्रयास गरिरहेको छ ।
सरकारले विभिन्न राजनीतिक दल तथा सरोकार भएकाहरूसँग वार्ताका लागि उच्चस्तरीय राजनीतिक संवाद समिति गठन गरेको हो । सोमबार बसेको मन्त्रिपरिषद् बैठकले कानुन, न्याय तथा संसदीय मामिलामन्त्री अनिल सिन्हाको संयोजकत्वमा समिति गठन गरेको छ । समितिको सदस्यमा सञ्चारमन्त्री जगदीश खरेल र प्रधानमन्त्रीका प्रमुख राजनीतिक सल्लाहकार अजयभद्र खनाल छन् ।
दलहरूसँगको दूरी कम गर्दै चुनावको सुनिश्चितता कायम गर्न सरकारका प्रतिनिधि दलहरूको कार्यालय पुगेका छन् । राजनीतिक संवाद समितिले कोटेश्वर पेरिसडाँडास्थित नेपाली कम्युनिस्ट पार्टीको कार्यालय अनुगमन गरेको छ । गत भदौ २३ र २४ गते जेनजी आन्दोलनका बेला राजनीतिक दलका कार्यालयमा भएको क्षतिको अवलोकन गर्न निस्किएको संवाद समिति अनुगमनका क्रममा मंगलबार नेकपा कार्यालय पुगेको हो । सिन्हाको नेतृत्वमा रहेको तीन सदस्यीय राजनीतिक संवाद समितिले नेकपा अध्यक्ष पुष्पकमल दाहाल ‘प्रचण्ड’सँग पनि भेटघाट गरेको छ ।
मंगलबार नै समितिले कांग्रेस, एमालेको कार्यालय पुगेर २३ र २४ भदौको आन्दोलनका क्रममा भएको आगजनीको क्षतिको जानकारी लिँदै चुनावमा भाग लिन अनुरोध गरेको छ । समिति सदस्य मन्त्री खरेलले चुनावको वातावरण बनाउन सरकारले सिंहदरबार र बालुवाटारमा मात्र बोलाउने होइन, चुनावको तयारी गर्नुस् भनेर सन्देश दिन पार्टी कार्यालय पुगेको बताएका छन् । उनको भनाइ यस्तो छ, ‘सरकार इमान्दारी साथ चुनाव गराउन खोजिरहेको छ भन्ने सन्देश हो । हामी चुनाव चाहन्छौँ, तपाईंहरू पनि चुनावको तयारी गर्नुस् भनेर सन्देश दिन उहाँको पार्टी कार्यालयमा सरकार आएको छ । चुनावको वातावरण बनाऊँ, भाग लिनुस् भन्नका लागि सरकार दलको दैलोमा पुगेको हो ।’ मन्त्री खरेलले तीनै दल चुनावका लागि तयार रहेको पनि जानकारी दिएका छन् ।
भनिन्छ, वादे–वादे जायते तत्व बोधः ! अर्थात् संवाद नै सबै खालका समस्याहरुको समाधान गर्ने सर्वोचित माध्यम हो । राजनीतिमा यो मन्त्र जपेरै अगाडि बढ्ने हो भने समस्या समाधानको उपाय पनि फेला पार्न सकिन्छ । त्यसकारण पछिल्लो समय सबैसँग संवाद गर्ने सरकारको कार्यशैली सकारात्मक छ । यसले देशमा चुनाव गर्ने कि अन्य विकल्पमा जाने भन्ने पनि सहमतिमै अघि बढ्न सकिन्छ ।
सरकार र दलहरुबीचको संवाद शीर्ष नेता तहमा पनि भएको छ । मंगलबार राष्ट्रपति रामचन्द्र पौडेलले शीतलनिवासमा आयोजना गरेको बैठकमा अन्तरिम सरकारकी प्रधानमन्त्री सुशीला कार्की, कांग्रेस सभापति देउवा, एमाले अध्यक्ष ओली, नेकपा संयोजक पुष्पकमल दाहाल प्रचण्डलगायत सहभागी थिए । सरकार बनेक सय दिनसम्म तीन दलका मुख्य नेताहरूसँग भेट नै नगरेकी प्रधानमन्त्री कार्कीले यसअघि दलका दोस्रो तहका नेताहरूलाई मात्र भेटेर चुनावका लागि सहयोग गर्न अनुरोध गरेकी थिइन् । जेनजी युवाहरूको आक्रोश दलका शीर्ष नेताहरूप्रति केन्द्रित रहेकाले प्रधानमन्त्री कार्की उनीहरूलाई भेट्न हच्किरहेकी थिइन् । तर सोमबार राष्ट्रपतिको सहजीकरणमा उनले शीतल निवासमा भेटघाट गरेर चुनावका लागि सहयोग गर्न अनुरोध गरेकी छन् ।
बैठकमा देउवा, ओली र प्रचण्डले निर्वाचनका लागि शान्तिसुरक्षाको वातावरण बनाउन सरकारलाई आग्रह गरेका थिए । नेकपा संयोजक प्रचण्डले पनि सरकारले शान्तिसुरक्षाको भरपर्दो व्यवस्था गर्नुपर्ने र पुराना दलहरूलाई विश्वासमा लिनुपर्नेमा जोड दिएका थिए । प्रधानमन्त्री कार्कीले तोकिएकै समयमा चुनाव गराउन आफ्नो मुख्य ध्यान रहेको उल्लेख गरेकी छन् ।
अर्कोतर्फ, जेनजी तथा आम जनताको आकांक्षाअनुरुप रास्वपा सभापति रवि लामिछाने र काठमाडौं महानगरपालिकाका मेयर बालेन शाह एक ठाउँमा उभिएका छन् । गत सोमबार राति भएको छलफलपछि निर्वाचनमा सहकार्य गर्ने बिन्दुमा उनीहरु पुगेका हुन् । यद्यपि, यसको घोषणा हुन भने बाँकी नै छ । रास्वपाले बालेनलाई भावी प्रधानमन्त्रीको रुपमा आगामी निर्वाचनमा अघि सार्ने भएको छ । उनीहरूबीच पुराना दलको दबदबा कम गर्न नयाँ दलहरू मिलेर जाने विषयमा छलफल भएको थियो । बालेनले आगामी फागुन २१ मा तोकिएको प्रतिनिधिसभा निर्वाचनमा एक भएर जाँदा युवाले मुलुकको नेतृत्व गर्ने अवसर आउने बताएका थिए । भेटवार्तामा भएका ठोस विषय सार्वजनिक नगरिए पनि मिलेर अघि बढ्नुपर्ने आवश्यकता र राजनीतिक सहकार्यका विषयमा सकारात्मक संवाद भएको नेताहरूको भनाइ छ । भेटलाई पछिल्लो समय दुवै पक्षबीच देखिएको राजनीतिक दूरी घटाउने प्रयासका रूपमा पनि हेरिएको छ । उनीहको भेटलाई रास्वपाका नेताहरुले एकदमै ऐतिहासिक र सुखद भविष्यको संकेतको रुपमा व्याख्या गरेका छन् ।
पछिल्लो समय रवि कारागारमा हुँदा प्रधानमन्त्री सुशीला कार्कीले नै चासो दिएकी थिइन् । रवि बाहिर हुँदा चुनावको माहोल बन्ने र उनीमाथि जनताको विश्वास पनि रहेको ठम्याइ प्रधानमन्त्री कार्कीलाई थियो । सोहीअनुरुप रवि बाहिर निस्किएलगत्तै नयाँ शक्तिबीच सहकार्य र एकताको सकारात्मक सन्देश गएको छ । यसले मुलुकमा निर्वाचनको बाटोको आधार तयार पारेको छ । जनधारणा साप्ताहिक
