काठमाडौं । नेपाली कांग्रेसका केन्द्रीय सदस्य मिनेन्द्र रिजालले संसद् पुनर्स्थापनाबारे पार्टीको स्पष्ट धारणा मागेका छन्। जारी केन्द्रीय समिति बैठकमा आफ्नो धारणा राख्दै दुई वटा मुद्दा पार्टीले बोल्न हुने बताए।
उनले भने, ‘अहिलेको संसद्ले आफ्नो म्यान्डेट गुमाएको थियो कि थिएन ? गुमाएको थिएन भने आन्दोलन किन भयो ? आन्दोलनको विरुद्धमा उभिऊँ न, यो आन्दोलन बेठीक थियो भनेर। होइन आन्दोलनलाई एकातिर बोक्ने, अर्कोतर्फ चाहिँ म्यान्डेट गुमाएको थिएन अहिलेको पार्लियामेन्टले भनेर भन्ने, दुइटा कुरा गर्न पाइँदैन। कांग्रेसले एक ठाउँमा उभिओस्, म्यान्डेट गुमाएको हो कि होइन ? म्यान्डेट गुमाएको हो भने नयाँ म्यान्डेटको लागि हिँड्न तयार होस्। नयाँ म्यान्डेटको लागि हिँड्न तयार होस्।’
उनले संसद्को म्यान्डेट कायम भए ओलीसँग खुला कुरा गर्न चुनौती दिए। कांगे्रसभित्र महामन्त्री गगन थापाले यसबीचमा एमाले अध्यक्ष केपी शर्मा ओलीसँग गोप्यरुपमा भेटेको चर्चा चलिरहेका बेला नेता रिजालले सांकेतिक कटाक्ष गरेका हुन् ।
संसद् पुनर्स्थापनाबारे पार्टीले चलाएको हस्ताक्षर अभियानबारे उनले भने, ‘खुल्ला गएर ओलीजीसँग संवाद गरे भयो नि। किन हामी थाहा नपाउने गरी कुरा गर्न जानुपर्ने हुन्छ र ? भेट्न जानुपर्ने हुन्छ र ? नेपाली कांग्रेसका नेताहरू र एमालेका नेताहरू हिजोसम्म हामीले चलाएको थियौँ सरकार। उहाँलाई यहाँ बोलाऊँ, कुरा गरौँ। उहाँको अफिसमा जाऔँ, कुरा गरौँ, टुङ्गो गरौँ।’
उनले कांग्रेस हिजो ओली र प्रचण्डसँग हिँडेकोप्रति असन्तुष्टि जनाए।
उनले थपे, ‘प्रचण्डसँग मिल्न पाए प्रचण्डसँग, ओलीसँग मिल्न पाए ओलीसँग। यता भए यता, उता भए उता। गर्या हामीले त्यही होइन ? गर्या त्यही होइन ? गठबन्धन बनाएर चुनाव लड्यौँ। सुविधा हामी सबैलाई प्राप्त थियो। म पनि लड्न पाएको भए गर्थेँ त्यही।’
