काठमाडाैं । द्वन्द्वकालीन मुद्दाहरूलाई नियमित अदालतले टुंगो लगाउन खोजेको भन्दै माओवादी धारका दलहरूले संघर्षका कार्यक्रम ल्याउने निर्णय गरेका छन्।
शुक्रबार प्रधानमन्त्री निवास बालुवाटारमा बसेको माओवादी धारका दलहरूको बैठकले सडक संघर्षमा जाने सम्मको तयारी गर्ने निर्णय गरेको वैज्ञानिक समाजवादी कम्युनिष्ट पार्टीका नेता जागृत रायमाझीले जनाए ।
‘फागुन २८ गते १ बजे संयुक्त रूपमा पत्रकार सम्मेलन गर्ने र ३० गते सर्वोच्च अदालतको पछिल्ला गतिविधिबारे अन्तरक्रिया गर्ने निर्णय भएको छ,’ रायमाझीले भने,’हामी आवश्यक परेमा सडक संघर्षमा जानुपर्छ भन्नेमा छौं।’
नेकपा माओवादी समाजवादीका अध्यक्ष लकर्णजित बुढाथोकीले शान्ति, स्थिरता हुँदै विकासको बाटोमा अगाडि बढेको बेलामा त्यसलाई रोक्ने प्रयास भएको जनाए।
‘कुन पार्टीको कुनै नेता सरकारमा छ त्यो फरक कुरा हो। सडक संघर्ष गर्ने पार्टीले हो। जनता र कार्यकर्ता सत्तासँग छैनन्,’ उनले भने,’सिंगो माओवादी आन्दोलनका उपलब्धिलाई कमजोर बनाउन सर्वोच्च अदालतले आफ्नो अधिकारभन्दा बाहिर गइरहेको छ। यसकाविरूद्ध हामीले शक्ति प्रदर्शन गर्न जरूरी छ।’
अहिले सर्वोच्च अदालतमा माओवादी केन्द्रका अध्यक्ष एवं प्रधानमन्त्री पुष्पकमल दाहाल ‘प्रचण्ड’ विरूद्ध रिट दर्ता भएको छ। दश वर्षे माओवादी सशस्त्र द्वन्द्वका क्रममा १७ हजार मानिस मारिएकामध्ये आफूले ५ हजारको जिम्मा लिने भन्दै प्रचण्डले सार्वजनिक अभिव्यक्ति दिएकाले उनलाई पक्राउ गर्नुपर्ने मागसहित रिट परेको हो।
उक्त रिटमाथि आज (शुक्रबार) सुनुवाइ हुँदैछ।
