काठमाडाैं । बुटवलमा मर्निङ वाकमा हिँडिरहेकी एक महिलाको मोटरसाइकलको ठक्करबाट मृत्यु भएको छ।
बुधवार बिहान बुटवल उपमहानगरपालिका- ११ कालिका पथ सडकमा मर्निङ वाकमा हिँडिरहेकी कालिका नगर कैलाश पथकी ५० वर्षीय लोककुमारी रेग्मीको मोटरसाइकलको ठक्करबाट मृत्यु भएको प्रहरीले जनाएको छ।
इलाका प्रहरी कार्यालय बुटवलका प्रमुख प्रहरी नायब उपरीक्षक इन्द्र रानाका अनुसार बुधवार बिहान करिब ६ बजेतिर कालिका पथ सडकमा पैदल हिँडिरहेकी रेग्मीलाई होराइजन चोकबाट योगिकुटी तर्फ जाँदै गरेको लु ९७ प १३४१ नं. को मोटरसाइकलले ठक्कर दिएको थियो।
मोटरसाइकलको ठक्करबाट सडकमा पल्टिएकी रेग्मीको टाउकोमा गम्भीर भित्री चोट लागेको थियो। दुर्घटनापछि तत्काल उपचारको लागि कालिका नगर स्थित चौराहा अस्पतालमा लगिएकोमा उपचारकै क्रममा उनको बुधवार साँझ ८ बजेतिर मृत्यु भएको प्रहरीले जनाएको छ।
उक्त मोटरसाइकल कालिका नगर निवासी ३२ वर्षीय सिजन थापाले चलाएका थिए। थापाले मादक पदार्थ सेवन गरेर मोटरसाइकल चलाएको प्रहरी नायब उपरीक्षक रानाले जानकारी दिए। दुर्घटनामा थापा पनि घाइते भएका छन्। उनको चौराहा अस्पतालमै उपचार भइरहेको छ।
सडक बिस्तारसँग पछिल्लो समय कालिका नगर सडक खण्डमा दुर्घटनाका घटना बढ्दै गएका छन्। मंगलबार राती पनि मोटरसाइकलको ठक्करबाट पैदल हिँडिरहेका एक युवा गम्भीर घाइते भएकाे थियाे ।
प्रहरी नायब उपरीक्षक रानाका अनुसार मङ्गलवार राति करिब साढे ११ बजे कालिका पथकै तीनकुने सडक खण्डमा गुल्मीको कालिगण्डकी गाउँपालिका वडा नं. ४ पूर्ति घाट निवासी ३१ वर्षीय सुबोध श्रेष्ठलाई मोटरसाइकलले ठक्कर दिएको थियो। सडकमा पैदल हिँडिरहेका श्रेष्ठ लु ७६ प ४९४६ नं. को मोटरसाइकलको ठक्करबाट गम्भीर घाइते भएका थिए। उक्त मोटरसाइकल अर्घाखाँचीको छत्रदेव गाउँपालिका वडा नं. ७ अर्घा तोष निवासी ३१ वर्षीय दिनेश पाण्डेले चलाएको प्रहरीले जनाएको छ।
मोटरसाइकलको ठक्करबाट घाइते भएका श्रेष्ठको बुटवलको लुम्बिनी सिटी अस्पतालमा गम्भीर अवस्थामा उपचार भइरहेको छ। दुर्घटनामा मोटरसाइकल चालक दिनेश पनि घाइते भएका छन्। उनको पनि सिटी अस्पतालमै उपचार भइरहेको प्रहरीले जनाएको छ।
