काठमाडौं । संवैधानिक राजसंस्था र सनातन हिन्दु अधिराज्यसहितको बहुदलीय प्रजातन्त्र स्थापनाका लागि संयुक्त जन आन्दोलन समितिले काठमाडौं जिल्लाका सबै पालिकामा भेला तथा आन्दोलन परिचालन समिति गठनको अभियान सुरु गरेको छ।
यसै क्रममा काठमाडौं महानगरपालिकाको एसआर पार्टी प्यालेसमा एक वृहत् सर्वदलीय तथा सर्वपक्षीय भेला सम्पन्न भएको छ।
भेलामा राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देन र राप्रपा नेपालका अध्यक्ष कमल थापाको उपस्थिति रहेको थियो। राष्ट्रिय शक्तिका संयोजक केशरबहादुर बिष्ट पनि उपस्थित हुने भनिए पनि उनी भने आएनन्।भेलालाई सम्बोधन गर्दै राप्रपा नेपालका अध्यक्ष कमल थापाले जनतालाई सडकमा उतार्नुपर्ने र यसका लागि आफूहरूले खट्नुपर्नेमा जोड दिए।
उनले आफूहरू राजनीतिक आमूल परिवर्तनको संघारमा रहेको बताउँदै आफूहरूले निर्माण गरेको पर्चा मात्र प्रत्येक घरमा पुर्याउन सके राजसंस्था पुनर्स्थापनाका लागि माहोल बन्ने दाबी गरे।
त्यस्तै, राप्रपा अध्यक्ष राजेन्द्र लिङ्देनले आफूहरू आफ्ना मान्यताहरू स्थापित गर्ने भन्दै दुई दशकको गणतन्त्रलाई सत्याग्रहको बाटोबाट अन्त्य गर्ने चेतावनी दिए। उनले सम्झौता नगर्ने हो भने हेलिकप्टरबाट देश छोड्नका लागि मौका दिइने खालका कडा अभिव्यक्ति दिए।
यस भेलाले काठमाडौं उपत्यकामा राजसंस्था र हिन्दु अधिराज्यको पक्षमा आन्दोलन थप सशक्त बनाउने संकेत दिएको छ।
