विराटनगर । कोशी प्रदेश सरकारको आयोजनामा सातै प्रदेशका मुख्यमन्त्री सहभागी हुने दुईदिने अन्तरप्रदेश मुख्यमन्त्री सम्मेलन–२०८३ आजदेखि विराटनगरमा सुरु हुँदैछ।
सम्मेलनमा संघीयताको सबलीकरण, अन्तरप्रदेश समन्वय, आर्थिक एकीकरण, प्राकृतिक स्रोतको उपयोग, विपद् व्यवस्थापन र विकास साझेदारीका विषयमा छलफल हुनेछ।
पहिलो दिन सातै प्रदेशका उपलब्धि तथा सफल अभ्यासबारे अनुभव आदानप्रदानसँगै सङ्घीयता र संस्थागत विकास तथा अन्तरप्रदेशीय आर्थिक साझेदारीसम्बन्धी कार्यपत्र प्रस्तुत गरिनेछ। साथै स्थानीय उद्योगी–व्यवसायीसँग उत्पादन तथा निर्यात प्रवर्द्धनका विषयमा अन्तरक्रिया हुनेछ।
सम्मेलनको दोस्रो दिन सातै प्रदेशबिच विकास साझेदारीको साझा प्रतिबद्धतासहित ‘कोशी घोषणा–२०८३’ जारी गर्ने कार्यक्रम छ। बिहान १० बजे घोषणापत्रमा मुख्यमन्त्रीहरूले हस्ताक्षर गर्ने र दिउँसो पत्रकार सम्मेलनमार्फत भावी कार्यदिशा सार्वजनिक गरिनेछ।
सम्मेलनमा अन्तरप्रदेश समन्वय र सहकार्यलाई प्रभावकारी बनाउँदै साझा विकासका योजना अघि बढाउने विषयमा छलफल हुने अपेक्षा गरिएको छ।
