काठमाडौं । नेकपा एमालेले सरकार संविधान र लोकतन्त्रको मर्मअनुसार नभई स्वेच्छाचारी र तानाशाही बाटोमा अघि बढिरहेको निष्कर्ष निकालेको छ।
आइतबार पार्टी केन्द्रीय कार्यालय च्यासलमा बसेको संसदीय दलको बैठकले यस्तो निष्कर्ष निकालेको प्रमुख सचेतक ऐनबहादुर महरले जानकारी दिए। उनका अनुसार बैठकले सरकार लोकतान्त्रिक व्यवस्था र राज्यका निकायमाथि प्रहार गर्न उद्दत रहेको आरोपसमेत लगाएको छ।
उनले सरकारले नागरिकको जनजीविकाको सवालमा काम गर्नुभन्दा नागरिकको मौलिक हक कुन्ठित गरिरहेको आरोप लगाए। उनले बैठकमा संसद्को दोस्रो अधिवेशनको गम्भीर समीक्षा गरिएको पनि जनाए।
संसद्ले सरकारलाई संसद्प्रति उत्तरदायी बनाउन नसकेको भन्दै उनले अगामी दिनमा प्रभावकारी बनाउने गरी अघि बढ्ने विषयमा समेत छलफल भएको बताए। उनका अनुसार बैठकले संसद् सत्ताको छायामा परेको निष्कर्षसमेत बैठकले निकालेको जनाए।
सरकारले संसद्को दोस्रो अधिवेशनमा कानुन निर्माणमा समेत उल्लेख भूमिका खेल्न नसकेको उनको भनाइ थियो। बजेट कार्यान्वयन र अध्यादेश प्रतिस्थापनसम्बन्धी विधेयक पास गर्नुबाहेक कानुन निर्माण गर्न नसकेको उनले बताए।
उनले भने, ‘अहिलेको सरकार स्वेच्छाचारी र तानाशाही बाटोमा उद्दत छ। संविधान र लोकतन्त्रको रक्षा गर्ने कुरा र जनताको जनजीविकाका सवालहरू सुदृढ गर्ने कुरामा सरकार चुकेको छ। र सरकार नितान्त फाँसीवादी बाटोमा हिँडेको छ।’
