काठमाडौं । नेपाली कम्युनिस्ट पार्टी (नेकपा)का वरिष्ठ नेता तथा पूर्वप्रधानमन्त्री झलनाथ खनालको अगुवाइमा समाजवादी जागरण अभियान सञ्चालन हुने भएको छ । शनिबार खनालको नेतृत्वमा सम्पन्न गोप्य भेलाले पछिल्लो समय ठुला वामपन्थी पार्टीहरूभित्र वैचारिक बहस तथा राजनीतिक प्रशिक्षण कमजोर हुँदै गएको निष्कर्ष निकाल्दै अभियान चलाउने निर्णय गरेको थियो ।
भेलाले समसामयिक राजनीतिक तथा वैचारिक विषयसँग सम्बन्धित विभिन्न प्रस्ताव पारित गरेको वामपन्थी नेता महेश्वर दाहालले बताए । ‘राजनीतिक तथा वैचारिक रूपमा वामपन्थी आन्दोलनलाई नयाँ ढंगले पुनर्गठन गर्नेगरी समाजवादी जागरण अभियान चलाउने निर्णय भएको छ । भेलाको उद्देश्य, कार्यक्रम र निर्णयहरूबारे सोमबार पत्रकार सम्मेलन गरेर जानकारी दिइन्छ’, दाहालले भने ।
उनका अनुसार नेकपा र विभिन्न वामपन्थी पार्टीबाट ७० जनाभन्दा बढी नेता भेलामा सहभागी भएका थिए । बिहान ८ बजेदेखि सुरु भएको भेला बेलुका ६ बजेसम्म चलेको थियो । सहभागीहरूका अनुसार कार्यकर्ता तहमा नेतृत्वप्रति असन्तुष्टि बढिरहेको अवस्थामा समाजवादी जागरण अभियानमार्फत नयाँ वैचारिक तथा राजनीतिक पहल अघि बढाउने सम्बन्धमा निर्णय भएको थियो ।
कार्यक्रमलाई गोप्य रूपमा आयोजना गरिए पनि भेलामा भएका छलफल, निर्णय तथा आगामी कार्यक्रमबारे आयोजक पक्षले सोमबार दिउँसो २ बजे पत्रकार सम्मेलनमार्फत जानकारी गराउने नेता दाहालले जानकारी गराए ।
पार्टी नेतृत्वप्रति असन्तुष्ट देखिएका खनालको अगुवाइमा भएको गोप्य भेलालाई अर्थपूर्ण रूपमा हेरिएको छ । भेलालाई नयाँ पार्टी खोल्नेभन्दा पनि समाजवादी जागरण अभियानको रूपमा बुझ्न दाहालले आग्रह गरे । पार्टी पुनर्गठनका लागि नेतृत्व नसच्चिए नयाँ पार्टी खोल्नका लागि प्रस्थान बिन्दु हुन सक्ने उनले स्पष्ट पारे ।
‘अहिले वामपन्थी आन्दोलनको पुनर्गठनका लागि समाजवादी जागरण अभियान चलाउने निर्णय गरेका छौँ । यो विशुद्ध राजनीतिक तथा वैचारिक समूह हो’, रातोपाटीसँग खनालले भने, ‘ठुला पार्टीको वर्तमान नेतृत्वबाट अब वामपन्थी आन्दोलन अगाडि बढ्न सक्दैन । समाजवादी जागरण अभियान तोड्न होइन, जोड्नका लागि हो । बृहत् वामपन्थी एकताका लागि प्रस्थान बिन्दु हो । यसबारे हामी पत्रकार सम्मेलन गरी प्रस्ट पार्छौं ।’
नेकपाका संयोजक पुष्पकमल दाहाल ‘प्रचण्ड’ र सहसंयोजक माधव कुमार नेपालको नेतृत्वमा अब वामपन्थी आन्दोलन अगाडि बढाउन नसक्ने निष्कर्षसहित खनालले असारको पहिलो हप्ता पार्टीमा ३६ बुँदे फरक प्रस्ताव पेस गरेका थिए । असोज ६ गते बसेको बसेको केन्द्रीय संयोजन समिति बैठकमा महाधिवेशन सम्बन्धी २२ बुँदे सुझाव पत्र उनले पेस गरेका थिए ।
भेलामा नेकपा, एमाले, साविक एकीकृत समाजवादी, क्रान्तिकारी कम्युनिस्ट पार्टी लगायत विभिन्न पार्टीबाट नेताहरू सहभागी भएको बुझिएको छ । सहभागीहरूको नामावली पनि पत्रकार सम्मेलन गरी जानकारी दिइने नेताहरूले जनाएका छन् । भेलामा खनालसहित निष्कासनमा परेका नेताहरू हरिबोल गजुरेल, कुलप्रसाद केसी, महेश्वर दाहाल, पानीराज बम्जन, क्रान्तिकारी कम्युनिस्ट पार्टीका प्रवक्ता हेमन्तप्रकाश ओली लगायत नेताहरू सहभागी भएको बुझिएको छ ।
यता नेकपाका प्रवक्ता प्रकाश ज्वालाले पार्टीबाट भेलामा सहभागी भएकाहरूको विषयमा आफूलाई कुनै जानकारी नभएको जनाए । ‘भेला भएको सुनेको छु । पार्टीको तर्फबाट को–को सहभागी भए भन्ने थाहा छैन । यस विषयमा म पनि बुझ्दैछु’, उनले भने ।
