काठमाडौं । नेपाली कांग्रेस संस्थापनइतर समूहले पनि १५औँ महाधिवेशनको प्रक्रिया सुरु गरेको छ ।
समानान्तर महाधिवेशन गर्ने तयारीमा रहेको संस्थापनइतर समूहले बिहीबार वडा अधिवेशन आयोजना गरेको हो । यसैक्रममा काठमाडौँ क्षेत्र नम्बर १ को संयुक्त वडा अधिवेशन उद्घाटन गर्दै कांग्रेस नेता प्रकाशमान सिंहले देशभर प्रारम्भ भइरहेको वडा अधिवेशन पार्टी फुटाउन नभई सुदृढीकरणका लागि भएको बताए । उनले विशेष अधिवशेनको नाममा १४ औँ महाधिवेशनले दिएको म्यान्डेट बमोजिमको केन्द्रीय कार्यसमितिलाई भङ्ग गर्ने प्रयास र जालझेल स्वीकार्य नहुने उल्लेख गरे ।
उनले गैर–वैधानिक कदमहरूले काङ्ग्रेसलाई कमजोर बनाउने दुष्प्रयास मात्र गर्ने भएकाले सत्य र नीतिको बाटोमा हिड्नुपर्ने धारणा राखे । आफुहरुले गर्ने महाधिवेशन नै आधिकारीक भएको उनको भनाइ छ ।
कांग्रेसको संस्थापन पक्षले यही असोज १८ गते महाधिवशेन सुरु गर्दैछ भने संस्थापनइतर समूहले पनि १५औँ महाधिवेशन आगामी मङ्सिर २१ देखि २३ गतेका लागि तोेकेको छ ।
संस्थापनइतर समूहले असोज २० गते पालिका, असोज २३ गते प्रदेशसभा निर्वाचन क्षेत्रीय र मङ्सिर ४ गते प्रदेश अधिवेशन सम्पन्न गर्ने कार्यतालिका तय गरि निर्वाचन आयोगलाई जानकारी समेत गराइसकेको छ ।
