काठमाडौं । वर्षा, बाढी तथा पहिरोका कारण देशका विभिन्न राजमार्गमा सवारी आवागमन प्रभावित भएको छ।
नेपाल प्रहरीले सम्भावित बाढी तथा सडकको अवस्थालाई मध्यनजर गर्दै केही सडकखण्डमा सवारी सञ्चालनमा रोक लगाएको तथा केही स्थानमा वैकल्पिक मार्ग प्रयोग गर्न व्यवस्था मिलाएको जनाएको छ।
काभ्रेपलाञ्चोक–सिन्धुली जोड्ने खुर्कोट–नेपालथोक–कटुन्जेबेँसी सडकखण्डअन्तर्गत बीपी राजमार्गमा रातिको समयमा सम्पूर्ण सवारी साधनको आवागमन रोकिएको छ। सम्भावित बाढीको जोखिमलाई ध्यानमा राख्दै साँझ ६ बजेदेखि बिहान ४ बजेसम्म अर्को सूचना नभएसम्म सवारी आवागमन बन्द गरिएको प्रहरीले जनाएको छ। बिहान ४ बजेदेखि बेलुका ६ बजेसम्म भने सवारी सञ्चालन हुने व्यवस्था गरिएको छ।
मकवानपुरमा विभिन्न राजमार्गमा सवारी साधन सञ्चालनका लागि छुट्टाछुट्टै व्यवस्था गरिएको छ। १० चक्कासम्मका सम्पूर्ण मालबाहक तथा ठूला यात्रुबाहक सवारी साधनलाई त्रिभुवन राजपथ हुँदै काठमाडौं जाने र फर्किँदा कान्ति राजमार्ग प्रयोग गर्ने व्यवस्था गरिएको छ। कान्ति राजमार्ग हुँदै हेटौंडातर्फ आउने यात्रुबाहक सवारी साधनले साँझ ६ बजेभित्र मकवानपुरको इलाका प्रहरी कार्यालय ठिङ्गन चेकपोस्ट पार गरिसक्नुपर्ने प्रहरीले जनाएको छ।
१४ सिटभन्दा कम क्षमताका साना यात्रुबाहक सवारी साधनलाई हेटौंडातर्फ आउँदा फर्पिङ–फाखेल–कुलेखानी हुँदै भीमफेदी र काठमाडौं जाँदा भीमफेदी–कुलेखानी–सिस्नेरी–दक्षिणकाली सडक प्रयोग गर्ने व्यवस्था गरिएको छ।
मकवानपुरको त्रिखण्डी नजिकै रहेको बेलिब्रिजको भारवहन क्षमता कमजोर रहेको भन्दै इन्धन तथा भारी मालबाहक सवारी साधनलाई उक्त पुल प्रयोग नगरी छेउमा रहेको डाइभर्सनबाट जान प्रहरीले आग्रह गरेको छ। विपद्जन्य अवस्था भएकाले अत्यावश्यक अवस्थामा मात्र यात्रा गर्न, राजमार्गमा पालोअनुसार सवारी चलाउन, ओभरटेक नगर्न तथा ट्राफिक व्यवस्थापनमा खटिएका सुरक्षाकर्मी र ट्राफिक प्रहरीको निर्देशन पूर्ण रूपमा पालना गर्न पनि आग्रह गरिएको छ।
नुवाकोटको टोखा–छहरे सडकखण्डमा पनि वर्षाका कारण अत्यावश्यक सेवाबाहेक अन्य सवारी साधनको रातिको आवागमन बन्द गरिएको छ। भदौ १ गतेदेखि अर्को सूचना जारी नभएसम्म राति १० बजेदेखि बिहान ५ बजेसम्म उक्त सडकखण्डमा सार्वजनिक तथा निजी सवारी साधन सञ्चालनमा रोक लगाइएको प्रहरीले जनाएको छ।
इलामको मेची राजमार्गअन्तर्गत इलाम नगरपालिका–९, राजदुवालीमा वर्षाका कारण सडक हिलो भएपछि सवारी आवागमन प्रभावित भएको थियो। प्रहरीका अनुसार उक्त सडकखण्ड साना सवारी साधनका लागि पूर्ण रूपमा सुचारु भइसकेको छ।
रसुवामा त्रिशूली नदीको कटान तथा बाढीका कारण सडक संरचनामा ठूलो क्षति पुगेको छ। उत्तरगया गाउँपालिका–५, खाल्टेस्थित त्रिशूली–मैलुङ–स्याफ्रुबेंसी जाने कच्ची सडकखण्ड त्रिशूली नदीले सडकमुनिबाट कटान गरेपछि अवरुद्ध भएको थियो। त्यसपछि आएको बाढीका कारण सडकको अधिकांश भाग नष्ट भएको प्रहरीले जनाएको छ।
त्रिशूली बजार, बेत्रावती हुँदै रसुवागढी नाकासम्म जाने मुख्य पासाङ ल्हामु राजमार्ग पनि त्रिशूली नदी किनारको अधिकांश भाग कटान भएपछि पूर्ण रूपमा अवरुद्ध भएको छ। स्याफ्रुबेंसीसम्म पुग्न काठमाडौं–टोखा–छहरे–विदुर–नुवाकोट दरबार–फलाँटे–चोकदे–लच्याङ–सरमथली–पार्च्याङ–भोर्ले–० किमि–कालिकास्थान–स्याउबारी–राम्चे–सोले–धुन्चे–स्याफ्रुबेंसी हुँदै जाने सिंगल लेनको कच्ची सडकलाई वैकल्पिक मार्गका रूपमा प्रयोग गर्न सकिने प्रहरीले जनाएको छ।
धादिङमा पृथ्वी लोकमार्गका दुई स्थानमा सडक पूर्ण रूपमा अवरुद्ध भएको छ। बेनिघाट रोराङ गाउँपालिका–७, कृष्णभीरमा त्रिशूली नदीले सडक कटान गर्दा सडक भासिएर मानिससमेत आवतजावत गर्न नसक्ने अवस्था बनेको छ। त्यस्तै, गजुरी गाउँपालिका–२, परेवाभीरमा बाढीका कारण सडकको तल्लो भाग भासिएपछि सडकखण्ड अवरुद्ध भएको प्रहरीले जनाएको छ।
ललितपुरको कान्ति लोकपथ पनि अवरुद्ध भएको छ। बागमती गाउँपालिका–३, भट्टेडाँडास्थित पाङदुरमा वर्षाका कारण माथिबाट पहिरो खसेपछि कान्ति लोकपथ पूर्ण रूपमा अवरुद्ध भएको प्रहरीले जनाएको छ।
