काठमाडौं । नेपाली कांग्रेसकी सहमहामन्त्री डा. डिला संग्रौलाले वैदेशिक रोजगारीका क्रममा साइप्रसमा रहेका नेपाली श्रमिकको हक–हित, सुरक्षा र कन्सुलर सेवाको सहज पहुँचका लागि राज्यले तत्काल ध्यान दिनुपर्ने जोड दिएकी छिन् ।
आइतबार नेपाली कांग्रेस निकट प्रवासमा रहेको संगठन नेपाली जनसम्पर्क समिति साइप्रसको तेस्रो अधिवेशनको भर्चुअल उद्घाटन समारोहलाई प्रमुख अतिथिका रूपमा सम्बोधन गर्दै संग्रौलाले साइप्रसमा रहेका घरेलु कामदार, विशेषगरी महिलाहरूमाथि हुने श्रम शोषण, अत्यधिक कार्यबोझ र घरेलु हिंसाजस्ता गम्भीर समस्या समाधानका लागि सरकार तथा सम्बन्धित निकायको ध्यानाकर्षण गराएकी हुन् ।
आइतबार नेपाली कांग्रेस निकट प्रवासमा रहेको संगठन नेपाली जनसम्पर्क समिति साइप्रसको तेस्रो अधिवेशनको भर्चुअल उद्घाटन समारोहलाई प्रमुख अतिथिका रूपमा सम्बोधन गर्दै संग्रौलाले साइप्रसमा रहेका घरेलु कामदार, विशेषगरी महिलाहरूमाथि हुने श्रम शोषण, अत्यधिक कार्यबोझ र घरेलु हिंसाजस्ता गम्भीर समस्या समाधानका लागि सरकार तथा सम्बन्धित निकायको ध्यानाकर्षण गराएकी हुन् ।
साइप्रसमा नेपालको स्थायी दूतावास नहुँदा इजरायलस्थित दूतावासबाट प्रदान गरिने सीमित घुम्ती सेवाले दैनिक समस्या हल गर्न नसकेको उल्लेख गर्दै उनले नियमित र प्रभावकारी कन्सुलर सेवाको व्यवस्था मिलाउन सरकारसँग माग गरिन् ।
साथै, वैदेशिक रोजगारीका नाममा भइरहेको ठगी र अत्यधिक शुल्क असुली नियन्त्रण गर्दै श्रमिकलाई सुरक्षित र सूचित रूपमा मात्र पठाउने वातावरण बनाउनुपर्नेमा उनले जोड दिइन् ।
यसैगरी सहमहामन्त्री संग्रौलाले भोटेकोशी क्षेत्रमा आएको विनाशकारी बाढीबाट रसुवा, नुवाकोट, धादिङ लगायतका जिल्लामा ठूलो जनधनको क्षति भएको प्रति गहिरो दुःख व्यक्त गर्दै प्रवासमा रहेका नेपालीहरूलाई राहत र पुनःस्थापनाका लागि ऐक्यबद्धता जनाउन आग्रह गरिन् । राजनीति र वैचारिक सीमाभन्दा माथि उठेर बाढीपीडितका लागि पारदर्शी रूपमा सहयोग जुटाउन जनसम्पर्क समितिलाई आह्वान गर्दै उनले संकलित रकमको शतप्रतिशत उपयोग र पारदर्शिता सुनिश्चित हुनुपर्ने बताइन् ।
डा. संग्रौलाले गत पुसमा सम्पन्न विशेष महाधिवेशनबाट गगन थापाको नेतृत्वमा नेपाली कांग्रेस नयाँ चरणमा प्रवेश गरिसकेकाले अब नयाँ कार्यशैलीका साथ अघि बढ्नुपर्ने औंल्याइन् ।
कांग्रेसले इतिहासको गौरवमा मात्र सीमित नरहेर नयाँ पुस्ता, युवा, महिला र श्रमिकका बदलिँदा अपेक्षालाई समेट्नुपर्ने उनको भनाइ थियो । अधिवेशन केवल नेतृत्व चयन गर्ने माध्यम मात्र नभई विगतको आत्मसमीक्षा र आगामी स्पष्ट मार्ग तय गर्ने अवसर भएको उल्लेख गर्दै उनले अबको नेतृत्वलाई समस्यामा निरन्तर आवाज उठाउन र मातृभूमिमा पर्ने हरेक विपत्तिमा दायित्व निर्वाह गर्न सुझाव दिइन् । नेपाली जनसम्पर्क समिति साइप्रसमा ५०१ क्रियाशील सदस्य छन् । अधिवेशनले नयाँ नेतृत्व चयन गर्ने छ ।
