काठमाडौं । नेपाली कथानक चलचित्र ‘लालीबजार’को कानुनी विवाद लम्बिएकाे छ । गत वैशाख २५ गतेदेखि प्रदर्शनमा रहेको यो चलचित्र अहिले उच्च अदालत पाटनमा सुनुवाइको क्रममा छ । न्यायाधीशद्वय टंकप्रसाद गुरुङ र अच्युत कुइँकेलले चलचित्रको सफ्ट कपी मगाएर इजलासमै फिल्म हेर्न थालेपछि यो प्रकरण थप चर्चामा आएको छ ।
निर्माण पक्षका अनुसार फिल्मको प्रमोसनमा व्यस्त हुनुपर्ने समयमा अदालत धाउनुपर्दा मानसिक दबाब बढेको छ । निर्माण स्रोतले भन्यो, “हामीलाई साह्रै मानसिक तनाव भएको छ । प्रमोसनमा हिँड्नुपर्ने बेला अदालतमा उपस्थित हुनुपरेको छ । अहिले न्यायाधीशज्यूहरूलाई फिल्म देखाइरहेका छौँ ।”
अदालत परिसरमा अहिले अभिनेत्री Swastima Khadka स्वस्तिमा खड्का, निर्माता तथा अभिनेता Rabindra Singh Baniya रवीन्द्रसिंह बानियाँ, निर्देशक Pradeep Bhattarai प्रदीप भट्टराईसहित सिंगो निर्माण टिम उपस्थित रहेको बताइएको छ ।
उच्च अदालत पाटनले ‘लालीबजार’ विवादमा रोशनी वादी नेपालीले दायर गरेको रिटमाथि सुनुवाइ गर्दै हिजो प्रमाण मिसिल झिकाउने आदेश दिएको थियो । अदालतले फिल्मको सफ्ट कपी इजलासमा प्रस्तुत गरेर हेरेपछि फिर्ता लैजान मिल्ने गरी पेश गर्न निर्देशन दिएको थियो ।
निर्माण पक्षले अदालतमा फिल्मको सफ्ट कपी बुझाएपछि न्यायाधीशद्वयले फिल्म हेर्न सुरु गरेका हुन् । आजको सुनुवाइपछि अदालतले अन्तरिम आदेश जारी गर्ने वा नगर्ने भन्ने विषयमा निर्णय लिन सक्ने जनाइएको छ ।
यदि अदालतले फिल्ममा आपत्तिजनक वा संशोधन गर्नुपर्ने विषय देखेमा प्रदर्शन रोक्न वा आवश्यक दृश्य सच्याउन आदेश दिन सक्नेछ । अन्यथा फिल्मलाई यथावत प्रदर्शन गर्न बाटो खुल्नेछ ।
हालसम्म दुई लाखभन्दा बढी दर्शकले हेरिसकेको ‘लालीबजार’ले ६ करोड रुपैयाँभन्दा बढी ग्रस कलेक्सन गरिसकेको निर्माण पक्षको दाबी छ ।
