भक्तपुर । एभरेस्ट स्कुलले शैक्षिक सत्र २०८३ मा भर्ना भएका नवआगन्तुक विद्यार्थी तथा अभिभावकलाई स्वागत गर्ने उद्देश्यले आयोजना गरेको स्वागत तथा अभिमुखीकरण कार्यक्रम भव्य रूपमा सम्पन्न गरेको छ । भक्तपुर–२, मिबाछेस्थित विद्यालय परिसरमा आयोजित कार्यक्रममा अभिभावक, पत्रकार, सञ्चारकर्मी, शिक्षक, कर्मचारी तथा विद्यार्थीहरूको उल्लेखनीय सहभागिता रहेको थियो ।
कार्यक्रमको सभापतित्व विद्यालय व्यवस्थापन समितिका अध्यक्ष तथा रजनी जोशी ले गर्नुभएको थियो । कार्यक्रममा बोल्दै उहाँले विद्यालय शिक्षा केवल पाठ्यपुस्तकमा सीमित नभई विद्यार्थीको चरित्र निर्माण, संस्कार, सामाजिक उत्तरदायित्व तथा व्यवहारिक जीवनसँग जोडिनुपर्ने बताउनुभयो । उहाँले गुणस्तरीय शिक्षा प्रदान गर्न विद्यालय, अभिभावक र समुदायबीचको सहकार्य अपरिहार्य रहेको उल्लेख गर्दै एभरेस्ट स्कुलले शिक्षामा गुणस्तर र संस्कारलाई प्राथमिकतामा राख्दै आएको बताउनुभयो ।
कार्यक्रममा विद्यालयका संस्थापक प्रिन्सिपल भक्त राजभण्डारी ले विद्यालयका नीति, कार्यक्रम, शैक्षिक योजना तथा मूल्य–मान्यताका विषयमा प्रकाश पार्नुभएको थियो । उहाँले विद्यालयले विद्यार्थीको सर्वाङ्गीण विकासलाई केन्द्रमा राखेर शैक्षिक गतिविधि सञ्चालन गर्दै आएको जानकारी दिनुभयो ।
उहाँका अनुसार विद्यालयले नियमित पठनपाठनसँगै नैतिक शिक्षा, अनुशासन, नेतृत्व विकास, सिर्जनशीलता, व्यवहारिक सीप तथा प्रविधिमैत्री शिक्षालाई प्राथमिकता दिँदै आएको छ । विद्यार्थीहरूलाई अध्ययनसँगै समाजप्रति जिम्मेवार, संस्कारयुक्त र आत्मविश्वासी नागरिकका रूपमा विकास गर्ने लक्ष्यका साथ विभिन्न अतिरिक्त तथा सह–शैक्षिक कार्यक्रम सञ्चालन गरिँदै आएको उहाँले बताउनुभयो ।
त्यसैगरी विद्यालयले स्थानीय कला, संस्कृति, भाषा तथा सम्पदासँग विद्यार्थीलाई परिचित गराउने उद्देश्यले विभिन्न परियोजनामूलक तथा व्यवहारिक कार्यक्रम सञ्चालन गर्दै आएको जानकारी पनि कार्यक्रममा दिइएको थियो । विद्यालयले रेडियो प्रस्तुति, सार्वजनिक वक्तृत्व, साहित्यिक गतिविधि, शैक्षिक भ्रमण, खेलकुद तथा सामाजिक उत्तरदायित्वसम्बन्धी कार्यक्रममार्फत विद्यार्थीको प्रतिभा विकासमा जोड दिँदै आएको बताइएको थियो ।
कार्यक्रममा सहभागी अभिभावकहरूले विद्यालयले प्रदान गरिरहेको शैक्षिक वातावरण, अनुशासन, संस्कारमूलक शिक्षा तथा विद्यार्थीमैत्री सिकाइ प्रणालीप्रति सकारात्मक धारणा व्यक्त गरेका थिए । पत्रकार तथा सञ्चारकर्मीहरूले पनि वर्तमान समयमा व्यवहारिक, प्रविधिमैत्री तथा मूल्यमा आधारित शिक्षाको आवश्यकता बढ्दै गएको उल्लेख गर्दै विद्यालयले त्यसतर्फ प्रभावकारी पहल गरिरहेको बताएका थिए ।
कार्यक्रममा अन्य वक्ताहरूले पनि विद्यार्थीको उज्ज्वल भविष्य निर्माणमा विद्यालय र अभिभावकबीच निरन्तर समन्वय र सहकार्य आवश्यक रहेको धारणा राखेका थिए । उनीहरूले नवआगन्तुक विद्यार्थीहरूलाई नयाँ शैक्षिक यात्राका लागि शुभकामना व्यक्त गर्दै अनुशासन, मेहनत र सकारात्मक सोचका साथ अध्ययनमा अघि बढ्न आग्रह गरेका थिए ।
विद्यालयका अनुसार नवआगन्तुक विद्यार्थी तथा अभिभावकलाई विद्यालयको वातावरण, शैक्षिक प्रणाली, नियम तथा गतिविधिबारे जानकारी गराउने उद्देश्यले कार्यक्रम आयोजना गरिएको हो । स्वागत, परिचय तथा शुभकामना आदानप्रदानसहित सम्पन्न कार्यक्रम सौहार्दपूर्ण र उत्साहपूर्ण वातावरणमा सम्पन्न भएको विद्यालयले जनाएको छ ।
