काठमाडौं । उपत्यका मेयर्स फोरमले उपत्यकाभित्रका सबै पालिकाहरूलाई वैशाख १५ गतेदेखि शैक्षिक गतिविधि सञ्चालन गर्न आग्रह गरेको छ।
फोरमको बुधबार बसेको बैठकले वैशाख ११ गतेदेखि नयाँ विद्यार्थी भर्ना अभियान र वैशाख १५ गतेदेखि नियमित पठनपाठन सञ्चालन गर्न सम्बन्धित स्थानीय तहलाई अनुरोध गर्ने निर्णय गरेको हो।
सरकारले शैक्षिक सत्र २०८३ को भर्ना अभियान वैशाख १५ गतेदेखि र पठनपाठन वैशाख २१ गतेदेखि सुरु हुने सूचना जारी गरेको थियो। शिक्षा नियमावली २०५९ अनुसार शैक्षिक सत्र वैशाख १ गतेदेखि नै सुरु हुने व्यवस्था रहेको भन्दै स्थानीय तहहरूले आ–आफ्नो शैक्षिक क्यालेण्डर अनुसार विद्यालय सञ्चालन गर्दै आएको फोरमले जनाएको छ।
फोरमले सरकारी निर्णय र स्थानीय तहको अभ्यासबीच देखिएको असमञ्जस्यताले विद्यालय सञ्चालनमा अन्योल सिर्जना भएको भन्दै गम्भीर ध्यानाकर्षण भएको पनि उल्लेख गरेको छ। संविधानको अनुसूची ८ तथा स्थानीय सरकार सञ्चालन ऐन २०७४ अनुसार आधारभूत र माध्यमिक शिक्षा स्थानीय तहको अधिकारभित्र पर्ने भएकाले शैक्षिक गतिविधि स्थानीय क्यालेण्डर अनुसार सञ्चालन गर्नुपर्ने फोरमले विज्ञप्तिमा उल्लेख गरेको छ।
सर्वोच्च अदालतमा परेको विद्यार्थी भर्ना सम्बन्धी मुद्दामा आएको अन्तरिम आदेश, सरोकारवाला निकायहरूको सुझाव तथा शैक्षिक संस्थाहरूबाट आएका गुनासोलाई समेत ध्यानमा राखिएको फोरमले जनाएको छ।
इन्धन संकटलाई समेत ध्यानमा राख्दै विद्युतीय सवारी साधनको प्रयोग बढाउन र आवश्यक परे अनलाइन कक्षा तथा वैकल्पिक माध्यमबाट पठनपाठन सञ्चालन गर्न तयारी गर्न सम्बन्धित सबैलाई फोरमले आग्रह गरेको छ।
काठमाडौँ उपत्यका मेयर्स फोरमका अध्यक्ष चिरीबाबु महर्जनले निर्णय कार्यान्वयनका लागि सबै स्थानीय तहलाई अनुरोध पनि गरेका छन्।
