काठमाडौं । नेपालले फिफा सिरिज–२०२६ नखेल्ने भएको छ । फिफा तालिकाअनुसार अप्रिल १२ र १५ मा नेपाली महिला टोलीले थाइल्यान्डमा ४ देशीय सिरिज खेल्ने तालिका थियो ।
तर, राष्ट्रिय खेलकुद परिषद् (राखेप)बाट निलम्बनमा परेपछि नाम फिर्ता लिइएको अखिल नेपाल फुटबल संघ (एन्फा)का प्रमुख कार्यकारी अधिकृत (सिइओ) इन्द्रमान तुलाधरले जानकारी दिए ।
‘राखेपले ३ महिनाका लागि निलम्बन गरेपछि फिर्ता लिनुबाहेकको अरू उपाय नै छैन,’ उनले अनलाइनखबरसँग भने ।
सिरिजका लागि एन्फाले चैत ११ गते ३२ खेलाडीको प्रारम्भिक टोलीको घोषणा गरेको थियो । सोही दिन राखेपबाट निलम्बनमा परेपछि खेलाडीहरूको क्याम्पसमेत हुन सकेको थिएन ।
सिरिजमा थाइल्यान्ड, नेपाल र कंगोसहित अर्काे एक देशले प्रतिस्पर्धा गर्ने तय थियो । तर, नेपालले सहभागिता नजनाउने भएपछि अर्काे देशले अवसर पाउनेछ ।
एन्फा र राखेपको विवाद कारण यसअघि चैत १२ गते दशरथ रंगशालामा हुने भनिएको नेपाल र हङकङबीचको अन्तर्राष्ट्रिय मैत्रीपूर्ण खेल पनि स्थगित भएको थियो ।
