निर्वाचन नजिकिँदै गर्दा मतदाताहरू पुराना दलका उम्मेदवारहरूसँग प्रश्नैप्रश्न सोधिरहेका छन् । शिक्षा, स्वास्थ्य, रोजगारी, सडक पूर्वाधार जस्ता आधारभूत क्षेत्रमा प्रगति नभएको गुनासोले आक्रोशको रूप धारण गरेको छ । यसैगरी, जिल्ला प्रशासन, मालपोत कार्यालय, यातयात कार्यालय लगायतका सरकारी निकायहरूमा सेवाग्राहीले भोग्नुपर्ने हैरानी र दलालीतन्त्रको सास्तीले मतदाताहरूलाई थप उत्तेजित बनाएको छ । यस परिस्थितिमा नयाँ दलहरू र युवा उम्मेदवारहरूसँग आशा र अपेक्षा बढेको छ ।
पुराना दलहरू कांग्रेस, एमाले, नेकपाजस्ताका उम्मेदवारलाई मतदाताहरूले यो निर्वाचनमा अहिलेसम्मको हिसाबकिताब गर्न लगाइरहेका छन् । विगतका सरकारहरूले शिक्षा क्षेत्रमा सुधार ल्याउन सकेनन् । स्कूलहरूमा शिक्षक अभाव, पाठ्यक्रमको अपडेट नहुनु र उच्च शिक्षाको गुणस्तर घट्दै जानुले युवालाई निराश बनाएको छ । स्वास्थ्य क्षेत्रमा पनि अस्पतालहरूमा औषधि र उपकरणको कमी, चिकित्सकहरूको अभाव र महँगो उपचारले जनतालाई सताएको छ । कोभिड महामारीपछि पनि स्वास्थ्य पूर्वाधार मजबुत बनाउन कुनै ठोस कदम चालिएन । रोजगारीको कुरा गर्दा लाखौं युवा बेरोजगार छन् । वैदेशिक रोजगारीमा जानेहरूको संख्या बढिरहेको छ, तर स्वदेशमा उद्योग र रोजगार सिर्जना गर्ने नीति प्रभावकारी भएन । सडक पूर्वाधारमा पनि ठूला परियोजनाहरू अलपत्र छन्, ग्रामीण क्षेत्रका सडकहरू वर्षायाममा हिलाम्मे हुन्छन्, जसले दैनिक जीवनलाई कष्टकर बनाएको छ ।
यी समस्याहरूको जडमा भ्रष्टाचार र दलालीतन्त्र छ । जिल्ला प्रशासन कार्यालयमा काम गराउन दलालहरूको सहारा लिनुपर्ने बाध्यता छ । मालपोत कार्यालयमा जग्गा दर्ता गर्दा घूस दिनुपर्ने, यातायात कार्यालयमा लाइसेन्स बनाउँदा हैरानी भोग्नुपर्ने अवस्था छ । यी सबैले जनतामा आक्रोश पैदा गरेको छ । जेनजी आन्दोलनले यी मुद्दाहरूलाई उजागर गरेको थियो ।
यसबीच, नयाँ दलहरू र युवा नेताहरूले आशाको किरण देखाएका छन् । राष्ट्रिय स्वतन्त्र पार्टी, उज्यालो नेपाल पार्टी, श्रम संस्कृति पार्टी जस्ता नयाँ दलहरूले ११४ राजनीतिक दलहरूको सूचीमा स्थान बनाएका छन् । रास्वपा सभापति रवि लामिछाने, रास्वपा वरिष्ठ नेता तथा काठमाडौंका पूर्वमेयर बालेन शाहजस्ता व्यक्तिहरूले युवा गठबन्धन बनाएर पुराना नेताहरूसँग प्रतिस्पर्धा गर्दैछन् । बालेन शाहले ओलीसँगै झापा–५ बाट उम्मेदवारी दिएका छन् । यी नयाँ उम्मेदवारहरूले भ्रष्टाचार अन्त्य, आर्थिक सुधार र युवा रोजगारीलाई प्राथमिकता दिएका छन् । सामाजिक सञ्जालमा देखिएको समर्थनले पनि यसलाई पुष्टि गर्छ, बालेन शाहको ¥यालीमा देखिएको भीडले पुराना दलहरूको असफलताको संकेत गर्छ ।
यो निर्वाचनले नेपालको राजनीतिमा परिवर्तन ल्याउने सम्भावना छ । पुराना दलहरूले युवा उम्मेदवारहरूलाई समावेश गरेर आफूलाई परिवर्तन गर्न खोजेका छन्, तर आन्तरिक कलहले उनीहरूलाई कमजोर बनाएको छ । कांग्रेसको आन्तरिक विभाजन र एमालेको पुरानै नेतृत्वले मतदातालाई विश्वास दिलाउन सकेको छैन । नयाँ दलहरूले भने सुशासन, पर्यटन विकास र आर्थिक वृद्धिलाई जोड दिएका छन् । तथापि, नयाँ दलहरूको संगठनात्मक कमजोरी र समयको अभावले चुनौती थपेको छ । पुराना दलहरूले आफ्ना गल्तीहरूबाट सिकेर सुधार नगरे, परिणाम फरक हुनेछ । नयाँ दलहरूले अपेक्षा पूरा गर्न सके, नेपालले नयाँ दिशा पाउनेछ । जनधारणा साप्ताहिक
