एजेन्सी । टी-२० विश्वकपको इतिहासमै विश्व च्याम्पियन भारतीय टोलीले आफ्नो सबैभन्दा फराकिलो हार बेहोरेको छ। आइतबार सुपर-८ अन्तर्गत तेस्रो खेलमा दक्षिण अफ्रिकाले भारतलाई ७६ अन्तरले हरायो। यससँगै प्रतियोगितामा भारतको लगातार जितको श्रृंखला पनि टुटेको छ। यसअघि भारतले लगातार १२ खेल जितेको थियो।
अहमदाबादमा भएको खेलमा दक्षिण अफ्रिकाले टस जितेर पहिले ब्याटिङ गर्दै निर्धारित २० ओभरमा ७ विकेट गुमाएर १८७ रन बनायो। जवाफमा भारतीय टोली १८.५ ओभरमा १११ रनमै अलआउट भयो।
दक्षिण अफ्रिकाका मार्को यान्सनले ४ विकेट लिए भने केशव महाराजले ३ विकेट लिए। त्यस्तै कर्बिन बोसले २ तथा एडेन मार्करमले १ विकेट लिए। भारतका लागि शिवम दुबेले सर्वाधिक ४२ रन बनाए। अन्यको प्रदर्शन गतिलो रहेन ।
यसअघि दक्षिण अफ्रिकाका डेभिड मिलरले ३५ बलमा ६३ रनको उत्कृष्ट इनिङ्स खेले। डेवाल्ड ब्रेविसले ४५ रन बनाए भने ट्रिस्टन स्टब्स २४ बलमा अविजित ४४ रन जोड्न सफल भए। भारतका जसप्रित बुमराहले ३ विकेट लिए भने अर्शदीप सिंहले २ विकेट हात पारे।
मिलर–ब्रेविसको साझेदारी निर्णायक
दक्षिण अफ्रिकाको सुरुआत राम्रो थिएन। टोलीले २० रनमै शीर्ष तीन विकेट गुमाएको थियो। क्विन्टन डी कक ६, एडेन मार्करम ४ र रियान रिकेल्टन ७ रनमै आउट हुदाँ पावरप्लेमा ४१/३ थियो। त्यसपछि डेभिड मिलर र डेवाल्ड ब्रेविसले मिलेर मात्र ५० बलमा ९७ रनको साझेदारी गर्दै रनगति झन्डै १० रन प्रति ओभर पुर्याए। यही साझेदारीकै आधारमा दक्षिण अफ्रिकाले भारतलाई १८८ रनको प्रतिस्पर्धात्मक लक्ष्य दिएको थियो।
भारतीय ब्याटरहरूको खराब लय
जवाफमा भारतीय ब्याटरहरू खेलमा खासै चल्न सकेनन्। लगातार चौथो खेलमा भारतका एक ओपनर शून्यमै आउट भए। यसपटक इशान किशनले खाता खोल्न सकेनन्। त्यसपछि तिलक वर्मा १ रनमै फर्किए। पाँचौँ ओभरको तेस्रो बलमा अभिषेक शर्मा १५ रनमा आउट भए। कप्तान सूर्यकुमार यादव (१८ रन) र वासिङ्टन सुन्दर (११ रन) ले पनि प्रभावशाली प्रदर्शन गर्न सकेनन्।
एक पनि अर्धशतक साझेदारी भएन
तीन विकेट छिट्टै गुमाएपछि भारत दबाबमा परेको थियो। त्यसपछि कुनै पनि अर्धशतक साझेदारी बन्न सकेन। सातौँदेखि १५औँ ओभरसम्म भारतले ५ विकेट गुमाउँदै मात्र ५७ रन जोड्यो। १५औँ ओभरमा केशव महाराजले एउटै ओभरमा हार्दिक, रिंकू र अर्शदीपलाई आउट गर्दै भारतको हार लगभग निश्चित गरिदिए।
सेमिफाइनल पुग्न फराकिलो जित चाहिने
ग्रुप–१ मा भारतले पहिलो खेलमै ७६ रनको हार बेहोरे सँगै टोलीको नेट रनरेट –३.८०० मा झारेको छ। अब सेमिफाइनलमा पुग्न भारतले बाँकी दुवै खेल ठूलो अन्तरले जित्नै पर्ने अवस्था सिर्जना भएको छ, ताकि उसको नेट रनरेट अन्य टोलीभन्दा राम्रो बन्न सकोस्।
