-निमकान्त पाण्डे
देश चुनावको माहोलमा हुँदा गत निर्वाचन र उपनिर्वाचनमा लोकप्रिय मतसहित निर्वाचित भएका रास्वपा सभापति रवि लामिछाने भने अदालत धाउनु परेको छ । रवि तिनै व्यक्ति हुन्, जसले रास्वपा जस्तो नयाँ दल स्थापना गरेर आफ्नो एक्लैको बलमा गत चुनावमा चौंथो दल बनाए । पुराना दललाई चुनौती दिए । तर, विभिन्न आरोपमा उनको सांसद पद मात्र खोसिएन, अदालत र जेल नै जानुपर्ने अवस्था आयो । रवि र रास्वपाले आफूलाई राजनीतिक प्रतिशोध भएको दाबी गर्दै आएका छन् । त्यो दुःखले रविलाई अहिले पनि छोडेको छैन ।
त्यो आक्रोश रास्वपाका हालैका चुनावी सभामा रविको तर्फबाट देखिएको छ । जनकपुरमा भएको सभामा रविले आगामी निर्वाचनमा सबैभन्दा धेरै भोट ल्याउने पार्टी बनाएर संसदमा जाने दाबी गरेका छन् । अघिल्लो निर्वाचनमा आफू सबैभन्दा धेरै मत ल्याउने सांसद बनेको उल्लेख गर्दै उनले त्यसपछि आफूलाई छलछाम गरेर हटाइएको जनाएका छन् । उनले अब पार्टीलाई थप सशक्त बनाउँदै जनताबाट अभूतपूर्व समर्थन प्राप्त गर्ने र संसदमा बलियो उपस्थितिसहित प्रवेश गर्ने संकल्प व्यक्त गरेका छन् । उनले आफूले सर्वाधिक मत ल्याएको इतिहासलाई अब पार्टीले सर्वाधिक मत ल्याएर थप मजबुद बनाउने दावी पनि गरेका छन् ।
मंगलबार प्रत्यक्षतर्फको उम्मेदवारी दर्ता गर्ने क्रममा फेसबुकमा उनको स्टाटस आयो, ‘देश निर्वाचनमय छ । देशभर मनोनयन दर्ताको रौनक चलिरहेको छ । तर विडम्बना, यो उत्साहमा म पूर्ण उत्साहित भएर मिसिन सकिरहेको छैन । किनकि आजै देशका तीन वटा (पर्सा, काठमाडौँ र रुपन्देही) अदालतमा मेरो मुद्दाको सुनुवाइ चलिरहेको छ । अरू अदालतको आदेश आउँदै होला । पर्सा जिल्ला अदालतबाट म भर्खर निस्किएको छु ।’ उनले आफूमाथि गरिएको पाप र अत्याचारको हिसाब–किताब नेपाली जनताले फागुन २१ मा घण्टी बजाएर दिने समेत जनाएका छन् । उनले सहकारीको बाटै नहिँडेको मान्छेलाई गनेरै नभ्याइने मुद्दै मुद्दा लगाइएको भन्दै आक्रोश पनि व्यक्त गरेका छन् ।
उनले लेखेका छन्, ‘देशका सम्पूर्ण अपराधीहरू एक ठाउँमा जम्मा भएर म माथि गरेको अत्याचारका कारण तिमीहरू सब रसातलमा पुग्दै गरेको दृश्य इतिहासले देख्दैछ र लेख्दैछ । नभएको प्रमाण छ भन्ने, पापी हौ तिमीहरू । सहकारीको बाटै नहिँडेको मान्छेलाई गनेरै नभ्याइने मुद्दै मुद्दा लगाउने अत्याचारी हौ तिमीहरू । म तिमीहरू सबैको गुण तिर्छु, चाँडै तिर्छु,बिना प्रतिशोध तिर्छु । फेरि पनि भन्छु म अभिमन्यु होइन ।’
पछिल्लो ३ वर्षयता देशमा सर्वाधिक चर्चामा रहेको दल र पात्रमध्येका एक हुन्, रवि । हुन त रवि टेलिभिजन कर्मका क्रममा पनि आफ्ना प्रस्तुति र गतिविधिका कारण चर्चामा थिए । तर रास्वपा स्थापना र त्यसको छोटो समयमा निर्वाचनमा सहभागी भई चौंथो दल बन्नु र रवि उपप्रधान तथा गृहमन्त्री बन्नुका कारण उनको चर्चा स्वभावतः धेरै भएको देखिन्छ । रवि यस अवधिमा राजनीतिक उदयले मात्र नभई अन्य विवादले पनि उत्तिकै चर्चामा रहे । नागरिकता, राहदानीदेखि अहिले सहकारीको बचत अपचलन प्रकरणमा मुछिए । नागरिकता प्रकरणमा उनले गृहमन्त्रीबाट राजीनामा दिनुपरेको थियो भने सांसद पद पनि खारेज भएको थियो । तर उपनिर्वाचनमा झन् धेरै मत ल्याएर रवि निर्वाचित भए । रविमाथि अहिले भने सहकारीको बचत हिनामिनामा संलग्न भएको आरोप छ ।
सहकारी ठगी प्रकरणमा रविको नाम जोडिएको र उनीबाट तत्कालीन समयमा केही गल्ती भएको देखिन्छ । तर यो प्रकरणमा प्रमुख आरोपितहरु भने केही फरार छन् त केही दल नजिक भएका कारण कारबाहीबाट उन्मुक्ति पाइरहेका छन् । उनीहरुलाई कारबाहीको दायरामा नल्याएसम्म र त्यस्ता व्यक्ति तथा सहकारीका सम्पत्ति बेचेर भए पनि पीडितलाई बचत फिर्ता गर्ने वातावरण नबनेसम्म पीडितले राहतको महसुस गर्न पाउनेछैनन् । सहकारीपीडित बचतकर्ताको अहिलेको मुख्य सरोकार बचत फिर्ता नै हो, तर यतिका समय बित्दासम्म पनि बचत फिर्ता गर्न भने कुनै ठोस काम हुन नसकेको छैन । न त फरार जीबीलगायतका मुख्य आरोपितलाई समात्न नै सरकारले सकेको छ । यस्तो अवस्थामा रविलाई समग्र सहकारी समस्याको मुख्य जड जस्तो देखाउने र उनको राजनीतिक भविष्य सिद्ध्याउन विभिन्न मुद्दा लगाउने सरकारी कदम पूर्वाग्रही देखिन्छ । यसको सट्टा मुख्य आरोपितलाई समात्ने र बचत फिर्ता गर्ने वातावरण बनाउन सरकार लाग्नुपर्ने थियो । तर, यसअघिका एमालेलगायतको नेतृत्वको सरकारले त्यसो गरेन ।
त्यसकारण अबको चुनावबाट रविले पुराना दलका नेतृत्वसँग त्यसको हिसाब लिने सम्भावना छ । रास्वपा अहिले बालेन्द्र शाहलगायत नेताको सहभागिताले थप बलियो बनेको छ । देशैभर रास्वपाप्रतिको लहर र रविप्रतिको सहानुभूतिले पनि आगामी चुनावमा रास्वपा झन् बलियो बनेर आउने निश्चित छ । यसले रविप्रतिको प्रतिशोध साध्ने अवस्था के हुने हो, त्यो भने आउने दिनमा नै देखिनेछ । जनधारणा साप्ताहिक
