काठमाडौं । म्यानमारमा यही नोभेम्बर २२ देखि ३० सम्म हुने एएफसी यु-१७ एसियन कप छनोटमा नेपाली टोलीको मुख्य प्रशिक्षककाे जिम्मेवारी सञ्जीत सिंहले नै सम्हाल्ने भएका छन् ।
गत सेप्टेम्बरमा श्रीलंकामा सम्पन्न साफ यु-१७ च्याम्पियनसिपमा युवा टोलीको नेतृत्व गरेका सिंहलाई आइतबार सातदोबाटोस्थित अखिल नेपाल फुटबल संघ (एन्फा) मुख्यालयमा महासचिव किरण राईले नियुक्ति पत्र हस्तान्ततण गरे ।
एन्फाले श्रीलंका भ्रमण गरेका अफिसियल टोलीलाई म्यानमारमा पनि निरन्तरता दिएका छन् । एन्फाले सहायक प्रशिक्षकको जिम्मेवारी राम चन्द्र थापामगर र देव कुमार मादेनलाई नै दिएको छ । त्यस्तै टिम म्यानेजरमा भरत बहादुर बस्नेत र फिजियोथेरापिस्टमा विनोद भट्टराई रहेका छन् ।
गोलकिपर प्रशिक्षकको जिम्मेवारी भने प्रवीण श्रेष्ठलाई दिइएको थियाे । श्रीलंकामा राजु सिंह महर्जनले यो जिम्मेवारी लिएका थिए । एएफसीको नियमअनुसार अफिसियलमा टिम डाक्टर हुनुुपर्ने नियम छ । यसैअनुसार धर्मेन्द्र कुमार यादवले टिम डाक्टरको जिम्मेवारी पाएका छन् ।
समूह ‘जी’मा रहेको नेपालले नोभेम्बर २२ मा सिरियासँग खेल्दै प्रतियोगिताको सुरुआत गर्नेछ । त्यसपछि नेपालले नोभेम्बर २४ मा घरेलु टोली म्यानमार, २६ मा ओमान र २८ मा अफगानिस्तासँग प्रतिस्पर्धा गर्नेछ । सिंगल राउन्ड रोविन लिगपछि समूहको शीर्ष स्थानमा रहने टोलीले आगामी वर्ष साउदी अरबियामा हुने एसियन कपको २१औं संस्करणमा स्थान बनाउनेछ ।
टोलीले प्रतियोगिताका लागि तयारी थालेको एक हप्ता भइसकेकाे छ । खेलाडी काठमाडौंमै बन्द प्रशिक्षणमा बसिरहेका छन् ।
