काठमाडौं । साताको दोस्रो कारोबार दिन नेप्से परिसूचक ४४.२५ अङ्कले बढेर २५४७.६० बिन्दुमा रोकिएको छ । नेप्से बढे पनि कारोबार रकम भने अघिल्लो दनिको तुलनामा केही घटेको देखिएको छ ।
आइतबार नेप्से परिसूचक ७८.८३ अङ्क घटेर नेप्से परिसूचक अन्तिममा २ हजार ५०३.३५ विन्दुमा बन्द भएको थियो ।
आइतबारको कारोबारमा ६ अर्ब ७० करोड ७२ लाख रुपैयाँभन्दा बढीको १ करोड ४३ लाख ६४ हजारभन्दा बढी सेयर कारोबार भएकोमा आज भने कुल ३३० स्टकको ४ अर्ब ९७ करोड ५४ लाख ८ हजार ५४५ रुपैयाँ बराबरको ९९ लाख ४ हजार ८७४ कित्ता सेयर कारोबार भएको छ ।
आज सेन्सेटिभ इन्डेक्स ५.१४, फ्लोट इन्डेक्स २.६५ र सेन्सेटिभ फ्लोट इन्डेक्स १.९७ अङ्क बढेको छ । यसदिन नेपाल माइक्रो इन्स्यारेन्सको सेयर मूल्य प्रतिकित्ता १० प्रतिशतले बढेर १३००.२० रुपैयाँमा अन्तिम कारोबार भएको छ ।
नेपाल रिइन्स्योरेन्सको सेयर मूल्य प्रतिकित्ता १० प्रतिशतले बढेर १२९९.२० रुपैयाँमा अन्तिम कारोबार भएको छ । यस्तै, क्रेष्ट माइक्रो लाइफ, इनर्जी नेपाल लिमिटेड र एनआरएन इन्फ्रास्टक्चरको सेयर मूल्यमा पनि सकारात्मक सर्किट लागेको छ ।
यस्तै, कर्पोरेट डेभलपमेन्ट बैंकको सेयर मूल्य प्रतिकित्ता ५.२६ प्रतिशतले घटेर १८०० रुपैयाँमा अन्तिम कारोबार भएको छ । थ्रिस्टार हाइड्रोको सेयर मूल्य पनि प्रतिकित्ता ४.४५ प्रतिशतले घटेर ७३० रुपैयाँमा अन्तिम करोबार भएको छ ।
यसदिन १३ वटै उपसमूहको परिसूचक बढेको छ । जसमध्ये अन्य उपसमूहको परिसूचक सर्वाधिक ५.०१ प्रतिशत बढेको छ । त्यसैगरी, यसदिन होटल तथा पर्यटन उपसमूहको परिसूचक करिब साढे ३ प्रतिशत बढेको छ भने जलविद्युत, लगानी र व्यापार उपसमूहको परिसूचक २ प्रतिशतभन्दा बढी बढेको छ ।
