काठमाडौंं । नेकपा एमालेका महासचिव शंकर पोखरेलले आफ्नो पार्टीमाथि चार वटा शक्तिले हमला गरिरहेको लज्जाजनक दाबी गरेका छन्।
एमालेले राष्ट्रहित र जनताका सवाललाई सशक्त ढंगले उठाँउदा यस्तो हमला भए पनि उनीहरुको स्वार्थ पूरा हुन नदिन एमालेले सशक्त प्रतिवाद गर्नुपर्ने उनले जनाए।
एमाले काठमाडौं जिल्ला कमिटीको छैटौं बैठकलाई आज टोखामा सम्बोधन गर्दै महासचिव पोखरेलले एमालेलाई राजावादी, माओवादी, समाजवादी पपुलिष्ट राजनीति गर्नेहरु र विदेशी शक्तिहरुले हमला गरिरहेको जनाए ।
‘एमालेलाई मुख्यगरी अहिले चार वटा शक्तिले साइवर हमला गरिरहेका छन्। मुख्यगरी उनीहरु सामाजिक सञ्जालमार्फत एमालेलाई कमजोर पार्न खोजिरहेका छन्। राजावादी, माओवादी, समाजवादी पपुलिष्ट र बाह्य शक्ति,’ पोखरेलले भने, ‘एमाले कमजोर हुँदा यी सबैको स्वार्थ पूरा हुने भएकोले उनीहरु हामीमाथि खनिएका हुन्।’
एमाले नभएको भए राजालाई नारायणहिटी लगेर श्रीपेच लगाइदिन यस्तो अवरोध हुने थिएन भन्ने लागेर राजावादीहरु एमालेविरुद्ध खनिएको उनको जिकिर थियो।
एमालेलाई आक्रमण गर्ने अर्को शक्ति कम्युनिष्ट नामका माओवादी र समाजवादी भएको पोखरेलको भनाइ छ। नेपालमा एमालेलाई कमजोर नपारेसम्म आफूहरु बढ्न नसक्ने निष्कर्ष निकालेर माओवादी, समाजवादी र अन्य कम्युनिष्ट नामका पार्टीहरु एमालेमाथि हमला गर्न आउने गरेको उनले जनाए।
महासचिव पोखरेलले एमालेमाथि हमला गर्ने तेस्रो शक्ति राष्ट्रिय स्वतन्त्र पार्टी र बालेन शाहहरू भएको जनाए। ‘पपुलिजमका नाममा जनता अलमल्याएर उनीहरुले एमालेमाथि हमला गरिरहेका छन्। किन भन्दा उनीहरूको गलत नीतिको प्रतिरोध र भण्डाफोर गर्न सक्ने एमाले हो भन्ने बुझेका छन्,’ उनले भने।
एमालेको खोइरो खन्ने बाह्य शक्ति भएको उनको भनाइ छ। एमाले कमजोर भयो भने नेपाललाई कठपुतली बनाउन पाइन्थ्यो भन्ने सोचाइ थुप्रैमा रहेकोले त्यसको निसाना पार्टी र यसका नेतृत्व भएको उनले दाबी गरे।
