एजेन्सी । अमेरिकाले इरानमाथि गरेको आक्रमणको कडा मूल्य चुकाउनु पर्ने इरानले चेतावनी दिएको छ। इरानका परराष्ट्रमन्त्री अब्बास अराघ्चीले आइतबार अमेरिकी आक्रमणपछि कडा प्रतिक्रिया दिएका हुन्।
राष्ट्रपति डोनाल्ड ट्रम्पको निर्देशनमा इरानका तीन प्रमुख आणविक केन्द्रहरूमा गरिएको हवाई आक्रमणपछि सम्बोधन गर्दै उनले यसलाई ‘अत्यन्तै गम्भीर आक्रामकता र जघन्य अपराध’ को संज्ञा दिए।
अराघ्चीले चेतावनी दिँदै भने, ‘यसको परिणाम सधैँका लागि रहने तथा खतरनाक हुनेछ र यसको प्रभाव गहिरो पर्नेछ।’
उक्त प्रतिक्रिया उनले इस्लामिक सहयोग संगठन (ओआइसी) को ५१औँ परराष्ट्रमन्त्रीहरूको परिषद् बैठकमा दिएका हुन्। उक्त बैठक टर्कीको इस्तानबुलमा भइरहेको छ।
त्यसअघि उनले सामाजिक सञ्जालमार्फत पनि आफ्नो प्रतिक्रिया सार्वजनिक गरेका थिए।
इरानी राजनीतिज्ञ अब्बास अराघचीले अमेरिकाको आक्रमणको कडा निन्दा गर्दै भने, ‘वाशिङ्टनको युद्धप्रेमी र कानूनी मर्यादाहीन प्रशासन नै यो आक्रमणका खतरनाक परिणामहरू र दुर्गामी प्रभावहरूको पूर्ण रूपमा जिम्मेवार रहने छ।’
साथै उनले संयुक्त राष्ट्र सुरक्षा परिषद्को आपतकालीन बैठक बोलाउन मागसमेत गरेका छन्। संयुक्त राष्ट्रसंघ सुरक्षा परिषद्ले यस विषयमा चुप लाग्नु भनेको परिस्थितिलाई अझ खतरनाक बनाउनु भएको बताए।
त्यस्तै, इरानका आणविक स्थलहरूमा आक्रमण गरेपछि इरानको इस्लामिक रिभोल्युशनरी गार्ड्स कोर्प्स (आइआरजीसी) ले प्रतिशोधको चेतावनी दिएको छ।
इरानी सरकारी समाचार संस्था आइआरएनएमार्फत जारी गरेको विज्ञप्तिमा, गार्ड्स कोर्प्सले भनेको छ कि यस क्षेत्रभर फैलिएका अमेरिकी सैन्य अड्डाहरू निशानामा पर्नेछन्। उसले भन्यो, ‘यस क्षेत्रमा फैलिएका अमेरिकी सैन्य अड्डाहरु शक्तिको प्रतीक होइनन्, बरु तिनीहरू कमजोरीको निशानी हुन्।’
कोर्प्सले इरानले आत्मरक्षाको अधिकार सुरक्षित राख्ने भन्दै अमेरिकालाई ‘पछुतो हुने परिणामहरूको प्रतीक्षा गर्न’ चेतावनी दियो।
