आफ्नो पार्टीका सांसदहरूले सुरु गरेको प्रमाण संकलन अभियानमा यति ठुलो संख्यामा प्रत्यक्ष पीडितहरूको विवरण प्राप्त भएको उनले सुनाए ।
“बुधबारदेखि सोविता गौतम, शिशिर खनाल, हरि ढकाल, म लगायतका सांसद र साथीहरूले सामाजिक सञ्जालमार्फत आह्वान गरेका थियौँ,” झाले भने, “तपाईंहरूसँग कुनै प्रमाण छन् भने पठाइदिनुहोस् भनेका थियौँ । २४ घण्टामै एक हजारभन्दा बढी प्रमाण आइपुगे ।”
उनका अनुसार ती प्रमाणहरूमा नेपाली नागरिकहरू भिजिट भिसामा विदेश गएका क्रममा ठगिएको, बलात्कृत भएको, बाकसमा फर्कनु परेको, वा ठूलो रकम बुझाएर पनि काम पाउन नसकेको विवरणहरू समेटिएका छन् । “मानिसहरू पीडामा छन्, लुटिएका छन्। कसैले नबोल्ने हो भने नागरिकले कहिल्यै न्याय पाउँदैन,” झाले भने ।
गत पाँच वर्षमा मात्र सात लाखभन्दा बढी नेपाली भिजिट भिसामा विदेश गएको र त्यसमध्ये २० हजारलाई त्रिभुवन अन्तर्राष्ट्रिय विमानस्थलबाटै फर्काइएको उनले उल्लेख गरे ।
झाले यो अभियान कुनै ‘व्यक्तिगत प्रतिशोध’ नभई सुशासन र नागरिक हितका लागि गरिएको जनाए । “हामीले गृहमन्त्रीप्रतिको व्यक्तिगत आक्रोशका आधारमा हैन, प्रणाली सुधारका लागि यो पहल गरेका हौं,” उनले भने ।
सांसद झा लगायत रास्वपाका नेताहरूले संकलित प्रमाणहरूलाई आवश्यक अनुसन्धानका लागि सम्बन्धित निकायमा बुझाउने तयारी गरेका छन् । उनीहरूले यस विषयमा थप सत्यतथ्य सार्वजनिक गर्दै गम्भीर अनुसन्धान र दोषीमाथि कारबाहीको माग पनि गरेका छन् ।
भिजिट भिसा प्रकरणमा सचिवालयका कर्मचारीको नाम मुछिएपछि गृहमन्त्री रमेश लेखकमाथि राजीनामा दिन चौतर्फी दबाब बढेको छ ।
अख्तियार दुरुपयोग अनुसन्धान आयोगले हाल भिजिट भिसा प्रकरणमा त्रिभुवन विमानस्थल अध्यागमन कार्यालय प्रमुख तीर्थराज भट्टराईसहित गिरोहमा संलग्न रहेको आरोप लागेका पाँच जनामाथि अनुसन्धान गरिरहेको छ । उनीहरूका मोबाइललगायत विद्युतीय उपकरण बरामद गरी अनुसन्धान अघि बढाइएको छ ।
