काठमाडाैं । एएफसी महिला एसियन कप २०२६ छनोटको तयारीमा रहेको नेपाली महिला राष्ट्रिय फुटबल टोली अहिले थाइल्याण्ड भ्रमणमा छ । यही सन्दर्भमा नेपालले आज थाइल्याण्डविरुद्ध पहिलो मैत्रीपूर्ण खेल खेल्दैछ ।
थाइल्याण्डको राजधानी बैंककमा आयोजना हुने यो खेल ‘क्लोज डोर’ मा अर्थात् दर्शकबिनाको अवस्थामा हुनेछ । खेल नेपाली समयअनुसार दिउँसो ३ः३० बजे सुरु हुनेछ । नेपाली टोलीका लागि यो खेल आउँदो छनोट खेलहरूअघि प्रतिस्पर्धात्मक अभ्यासका रूपमा लिइएको छ ।
दुई टोलीबीचको दोस्रो अन्तर्राष्ट्रिय मैत्रीपूर्ण खेल २ जुनमा हुनेछ, जुन खेल भने सार्वजनिकरूपमा आयोजना गरिनेछ ।
थाइल्याण्डविरुद्धको यी दुई खेल नेपाली टोलीको खेल कौसल, फिटनेस र रणनीतिलाई परीक्षण गर्ने महत्वपूर्ण अवसरका रूपमा हेरिएको छ ।
थाइल्याण्ड भने एएफसी महिला फुटबलको तुलनात्मकरूपमा बलियो टोली मानिन्छ । घरेलु मैदानमा उनीहरूको बलियो पकड रहँदै आएको छ । यस्तो अवस्थामा नेपालका लागि आजको खेल प्रतिरक्षात्मक अनुशासन, आक्रामक संयोजन र खेलाडीको तालमेल परीक्षण गर्ने सुनौलो मौका हुनेछ ।
थाइल्याण्डविरुद्धको मैत्रीपूर्ण खेलपछिको मूल्याङ्कनका आधारमा नेपाली टोलीले आगामी छनोट चरणका लागि अन्तिम रणनीति तय गर्ने अपेक्षा गरिएको छ ।
नेपालले एएफसी महिला एसियन कप छनोटको पहिलो चरण उज्वेकिस्तानमा आगामी जुलाईमा खेल्नेछ ।
नेपाली टिम
गोलकिपर : एञ्जिला तुम्बापो सुब्बा, अञ्जना राना मगर, उषा नाथ
डिफेन्डर : अमृता जैशी, गीता राना, विमला बि., पूजा राना, निशा ठोकर, समीक्षा घिमिरे, मनमाया दमाई
मिडफिल्डर : अनिता बस्नेत, विमला चौधरी, रेनुका नगरकोटी, प्रीति राई, सरु लिम्बू, सबिता राना मगर, सरस्वती हमाल, सुष्मा तामाङ
फरवार्ड : सावित्रा भण्डारी, रश्मी कुमारी घिसिङ, चन्द्रा भण्डारी, अनिता केसी, रेखा पौडेल
