विश्वभर बदलिंदो सामाजिक तथा पारिवारिक संरचना, वृद्धावस्थाका मानिसहरुको बढ्दो संख्या तथा कामकाजी मानिसहरुको बढ्दो व्यस्ततासँगै बृद्धवृद्धाहरुको स्याहारसुसार तथा पालनपोषणको विषय पेचिलो बन्दै गएको छ ।
वृद्धावस्था भनेको आफ्नो दैनिक आवश्यकताका काम आफै गर्न नसक्ने उमेर हो र यो उमेरमा जुनसुकै बेलापनि अरु कोहीको साथ र सहयोग चाहिन्छ । सायद यही आवश्यकतालाई मध्यनजर गर्दै अमेरिकाले वृद्धवृद्धाको स्याहार सुसार गर्ने रोबोट तयार पारेको छ ।
म्यासाचुसेट्स इन्स्टिच्यूट अफ टेक्नोलोजीका इन्जिनियरहरुले यो रोबोटलाई विशेष गरी वृद्धवृद्धाहरुको दैनिक आवश्यकताहरुलाई ध्यानमा राखेर डिजाइन गरिएको हो । यो रोबोटले बुढाबुढीहरुलाई ओछ्यानबाट उठ्न मद्दत गर्ने मात्र नभएर कतै लड्न लागेमा पनि सम्हाल्दछ ।
वृद्धवृद्धाहरु चाहे बाथरुममा चिप्लिएर लड्न लाग्दा होस् वा भर्यांगमा सन्तुलन गुमेर लड्न लाग्दा होस्, यो तुरुन्तै रेस्क्यू मोडमा आउँछ र दुर्घटना हुनबाट बचाइहाल्छ । यो केवल शारीरिक सहयोगसम्म मात्र सीमित छैन । हल्का हिंडडुल, शरीर तन्काउने जस्ता हलुका व्यायाम गराउनेदेखि लिएर केही मोडेलमा भ्वाइस कमान्ड लिनेसम्मका काममा यो रोबोट वृद्धवृद्धासँग उभिन्छ ।
इबार रोबोट अहिले अनुसन्धानकै चरणमा रहेको र अत्याधुनिक प्रविधिका कारण सुरुआती अवस्थामा यो निकै महँगो पर्ने सम्भावना छ । साथै आम मानिससम्म यसलाई पुर्याउन अझै केही वर्ष लाग्नसक्छ ।
वास्तवमा वृद्धवृद्धाहरुलाई केवल सहारा मात्र नभई आफ्नो कुरा सुन्ने मानिस पनि चाहिन्छ । त्यसैले आफ्नो रोबोटलाई त्यसका लागि पनि सक्षम बनाउने र मानिसका भावनात्मक आवश्यकतालाई पनि बुझ्ने खालको क्षमताको विकास गर्ने दिशामा वैज्ञानिकहरुले काम गरिरहेका छन् । त्यसैले भविष्यमा यसमा मूड पत्ता लगाउने, कुराकानी तथा एक्लोपन कम गर्नेवाला फिचर पनि जोडिनेछ ।
