काठमाडौं / सरकारले राजनीतिक इगो साँध्ने गरी आफूलाई निशाना बनाइरहेको दाबी गर्दै आएका रास्वपा सभापति तथा पूर्वगृहमन्त्री रवि लामिछानेको भनाइलाई पुष्टि हुने गरी सहकारी पीडित भनिएका व्यक्तिबाट स्पष्टीकरण सार्वजनिक भएको छ । बुटवलको सुप्रिम बचत तथा ऋण सहकारी संस्थाका जाहेरीकर्तामध्येका एक नारायण पहराईले आफूले लामिछानेविरुद्ध जाहेरी नै नदिएको स्पष्ट पारेका हुन् ।
पहराईले फेसबुकमा लेख्दै आफूले बचत फिर्ताका लागि मात्र जाहेरी दिएको तर कोही व्यक्ति लक्षित गरी जाहेरी नदिएको स्पष्ट पारेका छन् । उनले आफ्नो उद्देश्य कसैलाई थुन्ने वा थुनाउने नभई उक्त सहकारीमा डुबेको बचन फिर्तासँग मात्र सरोकार रहेको पनि जनाएका छन् । प्रहरीले अभियोगपत्र र अन्य कागजातमा आफूलाई मुख्य जाहेरीकर्ताजस्तो प्रस्तुत गरेकामा पनि उनले आपत्ति प्रकट गरेका छन् । ‘मेरो उजुरी कोही व्यक्तिलक्षित थिएन, बचत फिर्ताका लागि मात्रै थियो । एक वचन नसोधी, सहमतिसमेत नलिई प्रहरीले मलाई नै मुख्य उजुरीकर्ता जसरी प्रस्तुत गरेर अनुसन्धान प्रतिवेदन बनाएछ,’ उनले लेखेका छन् ।
त्यस्तै उनले आफूभन्दा धेरै बचत हुनेलाई मुख्य उजुरीकर्ता नबनाएको तर आफूलाई मुख्य उजुरीकर्ता बनाएकोमा समेत आपत्ति जनाएका छन् । उनले आफूहरुले बचत फिर्ताका लागि उजुरी दिएको तर आजसम्म एक पैसा नपाएको समेत गुनासो गरेका छन् । पहराईले केही व्यक्ति पक्राउ गर्ने, थुन्ने र मुद्दा चलाउनेबाहेक यसबीचमा सरकारले पीडितलाई न्याय दिने के काम ग¥यो ? भन्दै प्रश्न समेत गरेका छन् । उनले आफू उजुरी फिर्ता लिन तयार भएको दाबी पनि गरेका छन् ।
लामिछाने हाल जिल्ला अदालत रूपन्देहीमा चलिरहेको सहकारी ठगी तथा संगठित अपराधसम्बन्धी मुद्दाका कारण पुर्पक्षका लागि थुनामा छन् । जबकि सहकारीपीडित बचतकर्ताको अहिलेको मुख्य सरोकार बचत फिर्ता हो, तर यतिका समय बित्दासम्म पनि सरकारले बचत फिर्ता गर्न भने कुनै ठोस काम गर्न नसकेको छैन । न त फरार जीबीलगायतका मुख्य आरोपितलाई समात्न नै सकेको छ । यस्तो अवस्थामा लामिछानेलाई समग्र सहकारी समस्याको मुख्य जड जस्तो देखाउने र उनको राजनीतिक भविष्य सिद्ध्याउन विभिन्न मुद्दा लगाउने सरकारी कदम पूर्वाग्रही देखिन्छ । त्यसलाई पहराईको स्पष्टीकरणले पनि बलियो बनाएको छ ।
त्यस्तै, राष्ट्रिय स्वतन्त्र पार्टीका सांसद मनिष झाले सभापति लामिछानेमाथि राजनीतिक प्रतिशोध साँधिएको कुरा प्रधानमन्त्रीले नै स्वीकार गरेको दाबी गरेका छन् । गत मंगलबार बसेको प्रतिनिधि सभाको बैठकमा बोल्दै सांसद झाले केही दिनअघि प्रधानमन्त्री केपी शर्मा ओलीले नयाँ दलबाट आएकालाई एक झापु लगाएर ठीक पारेर हिरासतमा पठाएको भन्दै प्रतिशोध स्वीकार गरेको बताएका हुन् । ‘वैशाख १४ गते काठमाडौंमा आयोजित एक कार्यक्रममा प्रधानमन्त्रीज्यूले नयाँ दलबाट आएका केहीलाई ठिक पार्नु थियो । एक झापु लगाएर ठिक पारेर हिरासतमा पु¥याएँ । उहाँप्रति आभार छ, स्वीकार्नुभयो राजनीतिक प्रतिशोध नै रहेछ,’ उनले संसद् बैठकमा भनेका छन् ।
यस्तो छ पहराईको भनाइ :
सुप्रिम बचत तथा ऋण सहकारी संस्थाका कयौं बचतकर्तामध्ये म पनि एक हुँ । सहकारीले बचत फिर्ता दिन नसकेपछि प्रहरीले उजुरी दिन भन्यो । र, इलाका प्रहरी कार्यालय, बुटवलमा उजुरी दिएँ । मेरो उजुरी कोही व्यक्तिलक्षित थिएन, बचत फिर्ताका लागि मात्रै थियो । एक वचन नसोधी, सहमतिसमेत नलिई प्रहरीले मलाई नै मुख्य उजुरीकर्ता जसरी प्रस्तुत गरेर अनुसन्धान प्रतिवेदन बनाएछ ।
‘नारायणबहादुर पहराई समेतको जाहेरीले वादी नेपाल सरकार’ भनेर रुपन्देही जिल्ला अदालतमा मुद्दा पनि चलाइयो । बचत फिर्ताको आग्रहबाहेक कुनै व्यक्तिविरुद्ध किटानी जाहेरी दिएको थिइनँ । तर, रवि लामिछानेविरुद्ध मैले नै किटानी जाहेरी दिएको जसरी प्रचार गरियो, गरिएकै छ । यो प्रचारमा सत्यता छैन ।
करोड-करोड बचत हुनेलाई छोडेर थोरै बचत रहेको मलाई जानकारी पनि नदिई प्रहरीले किन मुख्य उजुरीकर्ता बनायो, अझै बुझ्न सकेको छैन । मजस्तै अन्यले पनि बचत फिर्ता पाउने आशमा उजुरी गरेका थियौं । तर, यत्रो समय बित्यो, खै त ? संसदीय विशेष छानबिन समितिले बचत फिर्ताका लागि के–के सिफारिस ग¥यो भनियो । तर, सरकारले ति सिफारिस कार्यान्वयनमा ध्यानै दिएको छैन। केही व्यक्ति पक्राउ गर्ने, थुन्ने र मुद्दा चलाउनेबाहेक यसबीचमा सरकारले पीडितलाई न्याय दिने के काम ग¥यो ? केही गरेको छैन । बरु, हामीजस्ता पीडितलाई देखाएर राजनीति पो गरियो कि !
म कोही व्यक्ति लक्षित थिइनँ, छैन । मेरो व्यक्ति लक्षित नगरिएको उजुरीलाई देखाएर र त्यसैको आधारमा मुद्दा दर्ता गराएर केहीले स्वार्थ पूरा गर्न खोजेका हुन् भने म अहिले पनि उजुरी-मुद्दा फिर्ता लिन राजी छु । हामीले बचत फिर्ता मागेका हौं, यसमा प्रतिबद्ध छौं । हामीले यसलाई समात, उसलाई थुन, त्यसलाई मुद्दा चलाउ भनेका छैनौं । विधि–प्रक्रिया, अड्डा–अदालत र सरकारले पीडितलाई न्याय दिन्छ कि भनेर लामो समय चुप बसें । न्यायका नाममा पीडितलाई मात्र होइन अन्यलाई पनि निरन्तर अन्याय भएपछि बोल्न बाध्य भएको हुँ । निर्दोष फसाएर दोषी उम्काउने र सहकारी पीडितको पैसा फिर्ता पाउनुपर्ने मुख्य सवाललाई विषयान्तर गर्ने दुष्कर्मविरुद्ध सबै पीडितले खबरदारी गरौं । जनधारणा साप्ताहिक
