काठमाडौं । प्रतिनिधिसभा अन्तरगतको राज्य व्यवस्था तथा सुशासन समितिले राजसंस्था पुनःस्थापना पक्षले चैत १५ गतेको प्रदर्शनको क्रममा भएको लुटपाट, तोडफोड तथा आगजनीका घटनाबारे जवाफ दिन गृह मन्त्री रमेश लेखकलाई बोलाएको छ।
बुधवार सिंहदरबारमा बसेको समिति बैठकमा सांसदहरुले राजावादी समूहको प्रदर्शनको क्रममा भएको जनधनको क्षतिबारे सत्तापक्ष र प्रतिपक्षी दलका सांसदहरुले गृहमन्त्रीको जवाफ माग गरेका थिए।
राजसंस्था पुनःस्थापना पक्षधर समहूको प्रदर्शनबारे जवाफ दिन गृहमन्त्री शुक्रवारको समिति बैठकमा उपस्थित हुन सभापति सभापति रामहरि खतिवडाले गृहमन्त्रीलाई निर्देशन दिएका हुन्।
माओवादीका प्रमुख सचेतक हितराज पाण्डेले तीनकुने घट्नामा सरकारको गम्भीर त्रुटी रहेको भन्दै गृहमन्त्री आएर जवाफ दिनुपर्ने जनाएका थिए। प्रदर्शनलाई नियन्त्रण गर्नसक्ने स्थिति हुँदाहुँदै सरकारले सही कदम चाल्न नसक्दा स्थिति नियन्त्रण बाहिर गएको उनको आरोप थियो। पाण्डेले भने, ‘जहाँसम्म १५ गतेको घटना हो सरकारले ठिक गरेन नि त । आफ्नै प्रहरीले घेरा हालेको बेला चाहीँ समात्न नसक्ने । अनि अहिले आएर छिटोभन्दा छिटो सरकारले समात्छ भन्ने ? कसले पत्याउँछ यस्तो कुरो ? यसका लागि माननीय गृहमन्त्रीज्युलाई बालाउनुपर्छ र जवाफ माग्नुपर्छ ।’ उनले कमाण्डर दुर्गा प्रसाईंलाई समेत सरकारले नै भगाएको आशयको अभिव्यक्ति दिए। प्रहरीले घेरा हालेको बेला किन नसमाएको भन्दै प्रश्न गरे।
चैत १५ गतेको घटनापछि आन्दोलनको नेतृत्वकर्ता प्रसाईं भागेका छन्। उनलाई खोज्न प्रहरीले जनशक्ति परिचालन गरे पनि सकेको छैन। घटना पत्रकारसहित दुई जनाको ज्यान गएको छ भने दुईवटा घरमा आगो लगाएर ध्वस्त पारिएको छ। त्यस्तै एकीकृत समाजवादीको पार्टी कार्यालय, भाटभटेनी सुपर मार्केटमा लुटपाट, निजी सवारी साधनमा आगजनी गरिएको छ।
