ललितपुर । डिभिजन वन कार्यालय ललितपुरले गोदावरीको वन क्षेत्रबाट अवैध रूपमा ढुंगाखानी उत्खनन्, ओसारपसार, निकासी र बिक्री गरेको अभियोगमा सुमेरु सेभिङ्ग एण्ड क्रेडिट को-अपरेटिभका अध्यक्ष बिरेन्द्र महर्जनलाई ५ वर्ष कैद र ३ करोड २५ लाख बिगो कायम गरी मुद्दा दायर गरेको छ ।
सो मुद्दाको सेटिङ्ग मिलाउन महर्जनले सुमेरु सेभिङ्ग एण्ड क्रेडिट को-अपरेटिभ लि. मा निक्षेपकर्ताहरुले जम्मा गरेको रकमबाट संचालित सुमेरु सिटी अस्पताल पुल्चोक, सुमेरु अस्पताल धापाखेल, एशियन कलेज, शंकरापुर कलेज, सुमेरु मार्ट सातदोबाटोलगायतका संस्थाहरुबाट आउने रकम अपचलन गरेका छन् ।
यसरी सहकारीको रकमबाट संचालित संस्थाहरुबाट पूर्व संचालकहरु हेमराज दाहाल, विनोद आचार्य, दिलिप डंगोल, सुनिल डंगोलको मिलोमत्तोमा झण्डै मासिक २ करोड रुपैयाँ नाफा आर्जन गरेको रकम निक्षेपकर्ताहरुलाई नदिई अध्यक्ष महर्जनले अपचलन गरी आफू विरुद्ध वन कार्यालयले दायर गरेको मुद्दा मिलाउन लागेको स्रोतले दावी गरेको छ ।
प्रदेश सरकारले सुमेरु सेभिङ्ग एण्ड क्रेडिट को-अपरेटिभ लि.लाई संकटग्रस्त घोषणा गरेपछि अहिले सहकारी बन्द अवस्था छ । सहकारी बन्द भएपछि अध्यक्ष महर्जनलाई झन् सहकारीबाट संचालित संस्थाहरुबाट आएको रकम अपचलन गर्न सहज भएको छ । किनकी सहकारी नखुलेपछि निक्षेपकर्ताहरु सरकारको निर्णय के हुन्छ भनेर कुरेर बसेको अवस्था छ । यसको प्रत्यक्ष फाइदा पूर्व संचालक र अहिलेका संचालक महर्जनले राम्रैसँग फाइदा उठाइरहेका छन् ।
