काठमाडौं । न्युजिल्यान्ड फिफा विश्वकप २०२६ मा छनोट हुने दोस्रो देश बनेको छ । न्युजिल्यान्ड ओसियाना फुटबल महासंघ (ओएफसी)बाट विश्वकपमा छनोट भएको हो । उक्त विश्वकपका निम्ति न्युजिल्यान्डअघि एसिया महादेशबाट जापान छनोट भएको छ ।
सोमबार ओएफसी छनोटअन्तर्गत अकल्यान्डमा न्युजिल्यान्डले न्यु कालाडोनियालाई ३–० ले पराजित गर्यो । न्युजिल्यान्डको जितमा माइकल बोक्साल, कोस्टा बार्बारोउजेज र एलिजा जस्टले गोल गरे । माइकलले ६१औँ, बार्बारोउले ६६औँ र जस्टले ८०औँ मिनेटमा गोल गर्दै जित दिलाएका हुन् ।
न्युजिल्यान्डले यसअघि दुईपल्ट फिफा विश्वकपमा सहभागिता जनाइसकेको छ । न्युजिल्यान्ड सन् १९८२ र २०१० मा विश्वकपमा सहभागी थियो । फिफा विश्वकप २०२६ अमेरिका, मेक्सिको र क्यानडामा आयोजना गरिँदै छ ।
आउँदो वर्षको जुन ११ देखि विश्वकप सुरु हुने तालिका छ । विश्वकपमा तीन आयोजकसहित कुल ४८ राष्ट्रले प्रतिस्पर्धा गर्नेछन् ।
