काठमाडौं । चालु आर्थिक वर्ष २०८१/८२ को मङ्सिरमा ८४ हजारभन्दा बढीले वैदेशिक रोजगारीका लागि श्रम स्वीकृति लिएका छन् । यो चालु आवमा पाँच महिनाकै सबैभन्दा बढी हो ।
वैदेशिक रोजगार विभागका अनुसार मङ्सिरमा ८४ हजार २२७ जनाले र सबैभन्दा कम असोजमा ५३ हजार ४२५ जनाले श्रम स्वीकृति लिएका छन् । विभागका अनुसार कात्तिकमा ७० हजार ९९० जना, भदौमा ५७ हजार ४९३ जना र साउनमा ५९ हजार ५७५ जनाले श्रम स्वीकृति लिएर वैदेशिक रोजगारीमा गएका छन् ।
उन्नाइस प्रतिशतले वृद्धि
विभागका अनुसार गत आर्थिक वर्ष २०८०/८१ को तुलनामा चालु आवको यस अवधिमा वैदेशिक रोजगारीका लागि श्रम स्वीकृति लिने १८.६८ प्रतिशतले बढेको छ । गत आवको सो अवधिमा दुई लाख ७४ हजार ५१७ जनाले श्रम स्वीकृति लिएकामा चालु आवको यस अवधिमा तीन लाख २५ हजार ८१० जनाले श्रम स्वीकृति लिएर बिदेसिएको विभागले जनाएको छ । जुन सङ्ख्या गत आवको तुलनामा चालु आवमा ५१ हजार २९३ जनाले बढी हो ।
विभागका निर्देशक एवं सूचना अधिकारी गुरुदत्त सुवेदीले चालु आवमा वैदेशिक रोजगारीमा जानका लागि सबैभन्दा धेरै कात्तिक र मङ्सिरमा श्रम स्वीकृति जारी भएको जानकारी दिनुभयो । पछिल्लो पटक नयाँभन्दा पनि बिदामा आएर पुनः जानेको सङ्ख्या धेरै भएकाले पनि विगतको तुलनामा सङ्ख्या बढेको उहाँको भनाइ छ ।
मलेसिया जाने नेपाली श्रमिकको सङ्ख्या घटे पनि गत आवदेखि नै संयुक्त अरब इमिरेट्स (युएई), कतार र साउदी अरब जानेको सङ्ख्या बढेसँगै श्रम स्वीकृति लिनेको सङ्ख्या बढेको विभागले जनाएको छ । निर्देशक सुवेदीका अनुसार दसैँतिहार र छठ मनाएर फर्किने धेरै भएकाले नेपाली श्रमिकको सङ्ख्या कात्तिक र मङ्सिरमा धेरै भएकाले आउँदो पुसदेखि यो सङ्ख्या केही घट्छ ।
धनुषा पहिलो
मङ्सिरमा वैदेशिक रोजगारीका लागि श्रम स्वीकृति लिएकोमा जिल्लागत रूपमा सबैभन्दा धेरै धनुषा र सबैभन्दा कम मनाङ रहेका छन् । यस अवधिमा सबैभन्दा धेरै धनुषाका चार हजार ३७३ युवाले श्रम स्वीकृति लिएका छन् भने सबैभन्दा कम मनाङका १५ युवाले मात्रै श्रम स्वीकृति लिएको विभागले जनाएको छ । यस अवधिमा झापाबाट चार हजार ६४ जना, मोरङबाट तीन हजार ५७९ जना, सिराहाबाट तीन हजार २९३ जना छन् ।
यस्तै महोत्तरीबाट दुई हजार ९४०, सुनसरीबाट दुई हजार ७९३, रुपन्देहीबाट दुई हजार ६५४, सप्तरीबाट एक हजार ८१५ जना र बागलुङबाट एक हजार ७१२ ले वैदेशिक रोजगारीका लागि श्रम स्वीकृति लिएका छन् । श्रम वैदेशिक रोजगारीमा कम जाने जिल्ला क्रमशः मनाङ १५, मुगु ३८, मुस्ताङ ४९, डोल्पा ५६, कालीकोट ७८ र हुम्लाका ७९ जना छन् ।
आव २०७८/७९ बाट लयमा फर्किएको वैदेशिक रोजगारी चालु आवमा पनि उच्च देखिने सङ्केत छ । कोरोनाकालको लकडाउनयता आन्तरिक रोजगारीमा सङ्कुचन आएपछि विगत दुई वर्षयता वैदेशिक रोजगारीमा जानेको सङ्ख्याले उच्च रेकर्ड कायम गर्दै आएको छ । पछिल्लो पाँच महिनाको तथ्याङ्कले नेपालबाट दैनिक औसतमा दुई हजार १७१ युवा वैदेशिक रोजगारीमा जान श्रम स्वीकृति लिएको देखिन्छ ।
वैदेशिक रोजगारको ३० वर्षको इतिहासमा अघिल्लो र गत आवमा सबैभन्दा बढी युवा रोजगारी खोज्दै विदेश गएका थिए तर गत वर्षको पाँच महिनाको सङ्ख्यालाई तुलना गर्दा चालु आवमा वैदेशिक रोजगारीमा जानेको सङ्ख्या बढ्ने सङ्केत देखिएको छ ।
सरकारले श्रम स्वीकृति लिएर विदेश जान अनुमति दिएको तथ्याङ्क राख्न थालेको ३० वर्षमध्ये आव २०७९/८० मा सात लाख ७१ हजार ३२७ जनाले वैदेशिक रोजगारीका लागि अनुमति लिएका थिए । आव २०८०/८१ मा भने सात लाख ४१ हजार १३० युवाले वैदेशिक रोजगारीमा जान श्रम स्वीकृति लिएको विभागले जनाएको छ । यस्तै आव २०७८/७९ मा श्रम स्वीकृति लिएर वैदेशिक रोजगारीमा जाने युवाको सङ्ख्या छ लाख ३० हजार ९० जना थियो ।
