काठमाडौं । नेकपा (एकीकृत समाजवादी)का सम्मानित नेता झलनाथ खनालले प्रधानमन्त्री केपी शर्मा ओलीको राजीनामा माग गरेका छन् ।
शनिबार काठमाडौंको बल्खुमा बाढीपीडितलाई खाद्यान्न वितरण कार्यक्रममा उनले सरकारबाट प्राकृतिक विपत्तिको पूर्वतयारी राम्रो हुन नसक्दा जनधनको ठूलो क्षति भएको उल्लेख गरे ।
जनता समस्यामा परेका भन्दै उनले वर्तमान सरकारले राजीनामा दिनुपर्नेमा जोड दिए । उनले हाल सरकार भएको आभास नभएको जनाए ।
त्यसैले जनताले आफ्नो सरकार बनाउने बाटो खुला गरिनुपर्ने उनको भनाइ थियो । वर्तमान सरकार पूर्ण रूपमा ‘फेल’ भएको भन्दै विपक्षीमा रहेका दलहरू अघि बढेर काम गर्नुपर्ने उनले धारणा व्यक्त गरेका छन् ।
खनालले मौसमविद्ले ठूलो वर्षा हुन सक्ने जानकारी गराउँदा पनि त्यसको तयारी सरकारले बेलैमा राम्रो ढंगले गर्न नसक्दा ठूलो क्षति भएको जनाए । सरकारको लापरबाहीका कारण जनता समस्यामा परेका उनले उल्लेख गरे ।
