काठमाडौं । नेकपा (एकीकृत समाजवादी)का १८ पदाधिकारी छान्न चुनाव गर्ने तयारी गरिएको छ । सर्वसम्मतिको प्रयास असफल भएपछि पदाधिकारी र पोलिटब्युरो सदस्य छान्न चुनाव गर्ने तयारी गरिएको हो ।
एकीकृत समाजवादीका नेता बलराम बास्कोटाले सहमति जुट्न नसकेकाले चुनावी प्रक्रियामा जाने तयारी भएको जनाए । “सहमति हुन सकेन । अब पदाधिकारी र पोलिटब्युरो सदस्य छान्न चुनावी प्रक्रियामा जाने छलफल भयो,”
निर्वाचन समितिका प्रमुख माधव पौडेलले निर्वाचन प्रक्रिया भोलिबाट सुरु हुने जनाए । “सहमतिका लागि प्रयास त भइहाल्छ,” उनी भन्छन्, “छलफल भइरहेको छ । भोलिबाट चुनावी प्रक्रिया सुरु हुन्छ ।”
एकीकृत समाजवादीमा अध्यक्ष र महासचिव सर्वसम्मत भएको डेढ महिनापछि अरू पदाधिकारीका लागि चुनाव हुन लागेको हो । गएको असार २० गते महाधिवेशनको हलबाट अध्यक्षमा माधवकुमार नेपाल र महासचिवमा घनश्याम भुसाल सर्वसम्मत भएका थिए । त्यस्तै, सम्मानित नेतामा झलनाथ खनाल सर्वसम्मत भएका थिए ।
महाधिवेशनमा नेपाल र भुसालको भिडन्त हुने सम्भावना बढेको थियो । तर, चौतर्फी दबाबपछि भुसाल पछि हटेका थिए । बाँकी १८ पदाधिकारी भने चयन गर्न हुन सकेन । महाधिवेशनले असार २१ गते ९३ सदस्य केन्द्रीय कमिटी घोषणा गरेको थियो । त्यसको करिब एक महिनापछि केन्द्रीय कमिटीले पूर्णता पाएको थियो । एकीकृत समाजवादीमा ३४३ सदस्यीय केन्द्रीय कमिटी बनाइएको छ ।
तर, पनि पार्टीमा असन्तुष्टि कायम नै छ । पदाधिकारी चयनलगायतका एजेन्डामा छलफल गर्न आइतबारबाट केन्द्रीय कमिटी बैठक जारी छ । एकीकृत समाजवादीमा २१ पदाधिकारीमध्ये वरिष्ठ उपाध्यक्षसहित सात उपाध्यक्ष, चार उपमहासचिव र सात सचिव चयन गर्न बाँकी छ । सहमति नजुटे पदाधिकारीमा चुनाव हुनुपर्ने माग केन्द्रीय सदस्यहरूले राखेका हुन् ।
