सिमकोट । प्रहरीले विद्यालय र टोल–टोलमा दुव्र्यसन र हिंसाविरुद्ध सचेतनाका कार्यक्रम बढाउँदै गएको छ। त्यस्ता घटना हुन नदिनका प्रहरीले सचेतनाका कार्यक्रम अभियानका रुपमा सञ्चालन गर्ने गरेको हो।
समाजमा कुनै प्रकारका घटना हुन नदिनका लागि जिल्ला प्रहरी कार्यालय र मातहतका प्रहरी चौकीले जिल्लाभर सचेजनाका कार्यक्रम सञ्चालन गरिरहेको प्रहरी निरीक्षक नरेन्द्र चन्दले बताए।
कुनै पनि आपराधिक घटना हुन नदिन र सभ्य समाज निर्माणका लागि प्रहरीले यस्ता कार्यक्रम सञ्चालन गरिरहेको छ। विद्यालय र टोलटोलमा प्रहरीले सञ्चालन गर्ने यस्ता सचेतनाका कार्यक्रममा घरेलु हिंसा, लागुऔषध, जवरजस्तीकरणी, मानव बेचबिखन र लैंगिक हिंसा रहेका छन्। ६ महिनायता प्रहरीले २०७ वटा यस्ता कार्यक्रम जिल्लामा सञ्चालन गरेको जानकारी दिँदै उनले यो कार्यक्रम सञ्चालन गरिएपछि घटना कम हुन थालेको बताए।
यी कार्यक्रम जिल्लाका सात वटै गाउँपालिकामा सञ्चालन गरिएको छ। जिल्लाभर सञ्चालन गरिएका जनचेतनामुलक कार्यक्रमबाट सात हजार ५८४ जना सर्वसाधारण र विद्यार्थी लाभान्वित भएको र त्यसमा चार हजार ४७३ महिला र तीन हजार १११ जना जानकारी लिन पाएका छन्।
सर्केगार्ड गाउँपालिका– ३ का दाने फडेराले टोल टोलमा प्रहरी आएर जनचेतना जोगाउने कार्यक्रम सञ्चालन गर्दा घटनामा कमी आउनुका साथै आपराधिक घटनाबारे सर्वसाधारणले जानकारीसमेत पाउने गरेको बताए।
सर्वसाधारणमा घटना घटाउनेविरुद्ध प्रहरीसमक्ष उजुरी गर्नुपर्ने जानकारी समेत भएको भन्दै उनले यसले प्रहरी र स्थानीयबीच सम्बन्ध पनि स्थापित हुन थालेको बताए।
