काठमाडौं । २० वाणिज्य बैंकहरूले गत आर्थिक वर्षको अपरिस्कृत वित्तिय विवरण सार्वजनिक गरेका छन् । बैंकहरुले सार्वजनिक गरेको वित्तीय विवरण अनुसार प्रभु बैंकको नाफा उल्लेख्य वृद्धि भएको छ भने नबिल बैंकले सबैभन्दा बढी नाफा कमाएको देखिन्छ ।
समग्रमा २० वाणिज्य बैंकहरुले औसतमा १३.४० प्रतिशत खुद नाफा बढेको सार्वजनिक अपरिस्कृत वित्तीय विवरणमा देखिएको छ । आर्थिक वर्ष २०७९/०८० मा २० वाणिज्य बैंकहरुले ५८ अर्ब ७६ करोड ९१ लाख रुपैयाँ खुद नाफा गरेको थियो । आर्थिक वर्ष २०८०-०८१ मा भने १३ प्रतिशतले खुद नाफा वृद्धि भएर ६२ अर्ब ७१ करोड ५३ लाख ८३ हजार पुगेको छ ।
आ.व. ७९-८० मा प्रभु बैंकको नाफा २८ करोड २ लाख १९ हजार रहेकोमा गत आवको अन्यमा १४९९.०४ प्रतिशतले वृद्धि भएर ४ अर्ब ४८ करोड ८ लाख १० हजार रुपैयाँ खुद नाफा पुगेको छ । योसँगै नाफा वृद्धि हुने वाणिज्य बैंकमध्ये प्रभु पहिलो स्थानमा समेत रहेको देखिएको छ ।
नाफा वृद्धि गर्ने पहिलो स्थानमा प्रभु भएपनि नाफा कमाउने पहिलो स्थानमा भने नबिल बैंक रहेको छ । गत आवको चौथो त्रैमासमा नबिलले ७ अर्ब ६ करोड ३३ हजार रुपैयाँ खुद नाफा कमाएको छ । जुन नाफा अन्य सबै वाणिज्य बैंक भन्दा बढी हो । नबिलले अघिल्लो आवको तुलनामा १०.२३ प्रतिशत बढीले नाफा कमाएको हो ।
२० वाणिज्य बैंकहरु मध्ये १० वाणिज्य बैंकको नाफा वृद्ध भएको छ भने अन्य १० को नाफा घटेको छ । एनआईसी एशिया बैंकको सबैभन्दा बढी नाफा घटेको छ । आव ०७९-०८० मा एनआईसीको खुद नाफा ४ अर्ब ४४ करोड ४७ लाख ६९ हजार रुपैयाँ कमाएकोमा गत आवमा ६८.९१ प्रतिशतले घटेर १ अर्ब ३८ करोड १८ लाख ६९ हजार रुपैयाँ मात्र पुगेको छ ।
सबैभन्दा कम स्ट्यान्डर्ड चार्टर्ड बैंको नाफा घटेको छ । स्ट्यान्डर्ड चार्टर्ड बैंकले आव ७९-८० मा ३ अर्ब ४६ करोड ५३ लाख ३० हजार रुपैयाँ खुद नाफा गरेकोमा गत आवमा ४.५१ प्रतिशतले घटेर ३ अर्ब ३० करोड ८९ लाख ५४ हजार रुपैयाँ मात्र खुद नाफा गरेको छ ।
त्यस्तै माछापुच्छ्रेको २३.०९ प्रतिशतले, सिटिजनको २९.९७ प्रतिशतले, नेपाल बैंकको ५१.८० प्रतिशतले, एनएमबिको २७.४९ प्रतिशतले, सानिमाको ८.५९ प्रतिशतले, सिद्धार्थको ४.७८ प्रतिशतले राष्ट्रिय वाणिज्यको ५.४८ प्रतिशतले र ग्लोबल आईएमईको १०.१३ प्रतिशतले नाफा घटेको छ ।
साथै, एनआईएमबीको ३९.७१ प्रतिशतले, प्राईमको २६७.१९ प्रतिशतले, एभरेष्टको १०.०७ प्रतिशतले, कृषि विकास बैंकको १७६.२३ प्रतिशतले, लक्ष्मी सनराइजको ३२.७९ प्रतिशतले, हिमालयनको ८१.६० प्रतिशतले, कुमारीको ३४५.६७ प्रतिशतले र नेपाल एसबीआई बैंकको २.३५ प्रतिशतले खुद नाफा वृद्ध भएको छ ।
